Cultura restaura'l campanariu de Les Pelayes

La Conseyería de cultura presentó güei el llabor de restauración de la torre del monesteriu de Les Pelayes, n'Uviéu. Esta obra ye la segunda parte d'iun ciclu de restauraciones qu'entamó l'añu pasáu col remocique de la fachada de San Vicente d'esti mesmu monesteriu y que finació integramente Caxastur por un importe de 102.000 euros. La tercer parte d'esta restauración, entovía pendiente anque comprometía pol Ministeriu de Fomentu, afecta a la fachada del claustru. El monesteriu tien tamién pendientes de cobrar 6.000 euros colos que poder iguar la sillería del coru de la ilesia, pieza del sieglu XVI.

El monesteriu de San Pelayo ye una posible fundación del sieglu X patrocinada por Teresa Ansúrez, vilda de Sancho el Gordu de Llión. En tiempos, el popular monesteriu de "Les Pelayes" foi el conventu de muyeres más importante d'Asturies, espoxigando abondo ente los sieglos XVI y XVII, rescamplando nestos años la construcción de la torre del campanariu, obra del 1654 llevantada en caliza de Piedramuelle, piedra que ye precisamente la causante de los problemes estructurales del monumentu qu'obligaron a los trabayos de restauración. Yá en 1921 remocicose la torre con refuerzos de cementu Portland que dañaron entovía más l'edificiu, anque depués de colocar en 1997 la campana nueva fundía n'Alemaña foi cuando se vio que'l monesteriu precisaba d'una restauración. El trabayu na torre pretende recuperar los valores estéticos orixinales del edificiu aplicando sistemes modernos de protección de la piedra. La restauración, presupuestada en 495.710,00 €, tien proyectu de Javier Hernández Cabezudo y la empresa alxudicataria ye ESFER, S.L..