Cultura presenta un ciclu de conciertos per toa Asturies con trenta bandes de gaites

Trenta bandes de gaites asturianes van celebrar, d'equí al próximu 6 de mayu, un ciclu de 33 conciertos per tolos conceyos que nun cuenten con banda de gaites propia. La Consejería de Cultura presentó esta mañana'l programa de conciertos, nel qu'invirtió cerca de 60.000 euros.

El director xeneral de Promoción Cultural y Política Llingüística del Principado, Carlos Madera y el director artísticu de la casa "Actos Producciones" Marcos Valles García, presentaron esta mañana esti programa de conciertos que s'entitula xenéricamente " Na gaita llevo Asturies". El responsable de Cultura sorrayó qu'esti ciclu de conciertos ye la primer vez que se fai y xustificó la filosofía del mesmu como un intentu de llevar la gaita a los conceyos onde nun tienen banda propia de gaites pa que "la música tradicional llegue a toles persones que nun tienen esti instrumentu tán cerca".


El productor Marcos Valles García esplicó que "la mayoría de les bandes de gaites d'Asturies participen nel ciclu y que les que nun lo faen va ser por problemes d'axenda". En total so 43 les bandes de gaites existentes, y cerca del 50% de los conceyos asturianos cuenten con, a lo menos, una banda de gaites propia.

Parres, Cabrales, Somiedu, Sotu'l Barcu, Samartín d'Ozcos, Colunga, Bual, Salas, Ayer, Pezós, Muros de Nalón, Santalla d'Ozcos, Grandas de Salime, Ponga, Taramundi, Candamu, Balmonte, Grau, Vilanova d'Ozcos, Riosa y Cangues d'Onís van ser los llugares onde se celebren les actuaciones, nes que van participar les bandes. La primer tanda d'actuaciones, nel mes de marzu, inclúi a les bandes Villa de Xixón, la del Centru asturianu d'Uviéu, La Raitana, La Salle, Fonte Fuécara, La Madreña, La llaguna del Torollu, Xiranda Tierra Astur, La reina del Truébano, Naranco, Mieres del Camín, Villa de Mieres, Sotu Rei, la BG de Tinéu y la Villa d'Avilés. N'abril y en mayu, les bandes que toquen van ser la Marino Tapiega, la banda d'occidente, El piñote de Gozón, la Camin de Fierro de Corvera, Xácara, Esbardu, Avante Cuideiru, El Teixo, Güestia, Faro de Luarca, BG de Llangréu, La Cuerria' l Texu, Llacín de Llanes, Noega y BG de Villaviciosa.