Cultura presenta esti llunes a d'Andrés como director de la Oficina de Política Llingüística

El procesu pa nomar el
Director de la oficina de Política Llingüística yá ta
peslláu. Depués d'una selmana llarga desque d'Andrés espresare la so voluntá d'aceptar el cargu, la entruga que reconcomía a l'asturianismu ta acabante de respondela'l Director Xeneral de Promoción Cultural y Política Llingüística Carlos Madera, quien confirmó a última hora d'esta mañana a Asturies.com que la presentación oficial de Ramón d'Andrés nel cargu va facese esti llunes 27 d'ochobre a les 5 de la tarde nun actu públicu a cellebrar na sé de la Conseyería de Cultura n'Uviéu

Anque
Ramón d'Andrés
yá confirmare a Asturies.com la otra selmana la so voluntá d'aceptar el cargu, la connfirmación definitiva tardó en cuayar en cuantes que facía falta definir y apautar los conteníos que van
desarrollase dende la Oficina. Ramón d'Andrés esplicó-y a Asturies.com que nel actu del llunes cuenta con presentar les llinies mayestres de lo que va ser el plan de normalización pol que va mandase'l llabor de la oficina.



Ramón d'Andrés nació en Madrid en 1959. Fíu
del conocíu escritor n'asturianu Manuel d'Andrés
Fernández"Mánfer de la Llera" d'Andrés ye Doctor
en Filoloxía Hispánica pola Universidá d'Uviéu.
Profesor de Llingua Asturiana na Escuela de Maxisteriu ente 1985 y 1998,
anguaño ye profesor titular na Facultá de Filoloxía de
Universidá d'Uviéu. Académicu de númberu de
l'Academia de la Llingua Asturiana, foi secretariu d'esta entidá hasta
que les diferiencies cola llinia d'actuación de la dirección de
l'Alla lleváronlu a dexar les sos responsabilidaes más directes
pa con esta institución, siendo públiques les sos discrepancies
cola Academia, de la que sigue siendo miembru.


Autor d'una bibliografía
bayurosa sobre cuestiones filolóxiques, d'Andrés trato d'empobinase bien de vegaes a un públicu ampliu con llibros de
calter divulgativu, casu de
"Cuestiones d'Asturianu Normativu" o el "Diccionariu
temáticu asturianu" anque la so obra más prestixosa ye
la conocía "Llingua y xuiciu : Sobre delles cuestiones
básiques del debate llingüísticu n'Asturies" cola
qu'algamó'l premiu d'ensayu Fuertes Acevedo en 1.998. Nel tarrén lliterariu, más que pola obra propio, el llabor más importante de d'Andrés foi la recuperación del llabor del desapaecíu autor xixonés Andrés Solar.

Ramón d''Andrés ye persona conocía tamién pola so abondante collaboración cola prensa, qu'entamó cuando se fizo
cargu de la sección n'asturianu "Alitar Asturies" nel
periódicu El Comercio, collaborando depués col selmanariu Les Noticies y
con Asturies.com cola so columna "Bilordios Filolóxicos" na que
trataba cuestiones divulgatives sobre l'usu correctu del idioma. La postrer
entrega de "Bilordios Filolóxicos" espublizóse esti mes
de setiembre, pero d'Andrés nun dixo qu'esto supunxere la fin de la
serie. Ye de suponer que cola nueva responsabilidá en gobiernu tardemos
en ver más d'estos"bilordios".