Cultura crea una llinia de subvenciones a la creación lliteraria nes trés llingües falaes n’Asturies

|
Llibros n'asturianu

La Conseyería de Cultura, Política Llingüística y Turismu asoleyó nel BOPA la convocatoria pa la llinia nueva d’ayudes pa la creación lliteraria n’asturianu, gallego-asturiano y castellanu en réxime de concurrencia competitiva. En total destínense 40.000 euros a esta iniciativa.

Cualquier asturianu residente n’Asturies mayor d’edá pueden optar a esta subvención creada pa “consolidar, arriquecer y prestixar les llingües y les sos cultures nel Principáu d’Asturies” que tien, asina mesmo, dos llinies: una pa profesionales del ámbitu cultural, esto ye, que tean daos d’alta nel impuestu d’actividades económicas al efeutu, y otra pa non profesionales.

Les bases afiten que les obres “habrán de tar escritas en cualquiera de les llingües d’Asturies,
tanto en castellanu como n’asturianu o eonaviego (gallego-asturiano)”. Pueden presentase nes modalidaes siguientes, con un máximo d’un proyeutu por categoría: narrativa, yá sía novela, novela curtia o llibru de rellatos (un mínimu de 30.000 pallabres); poesía (un mínimu de 500 versos), teatru (mínimu de 20.000 pallabres); cómic o novela gráfica (mínimu de 40 páxines); ensayu sobre un tema propiu del campu de les humanidaes (un mínimu de 30.000 pallabres); y lliteratura xuvenil (un mínimu de 20.000 pallabres).

La xente interesao ha entregar enantes del 8 de febreru una memoria esplicativa del trabayu que pretende facer, nun máximu de 3 fueyes. Un xuráu va decidir la puntuación de cada proyeutu teniendo la calidá artística y téunica, y la orixinalidá de la propuesta.

L’importe de la subvención a conceder en caúna de les dos llinies por modalidáu lliteraria será de 3.000 euros por cada beneficiariu y proyeutu. D’igual forna, el númberu máximu de subvenciones a conceder en cáuna de les llinies será de 7 –llueu d'una correición posterior fecha nel BOPA del 6 de febreru, yá que nun primer momentu la cifra afitada yera 5–, ordenando los proyeutos por puntuación de mayor a menor en cada llinia.

Los trabayos qu’algamen l’ayuda han tar terminaos pal 15 de setiembre y la xustificación ha entregase enantes del 30 d’esi mesmu mes.

Contador Estadistiques