Cultura convoca’l Premiu al Meyor Cantar 2011

El miércoles 5 de xineru, el Boletín Oficial del Principáu d'Asturies (BOPA) publicó la convocatoria del "Premiu al Meyor Cantar" en llingua asturiana o gallego-asturianu, un galardón qu'algama nel presente añu 2011 la so quinta edición.

El Gobiernu del Principáu d'Asturies instituyó esti Premiu nel añu 2007 coles mires de “consolidar” y “arriquecer” la creación musical asturiana. Acordies coles bases, pueden optar a esti galardón los cantares con lletra n'asturianu o gallego-asturianu que fueren comercializaes ente'l 1 de xineru y el 31 d'avientu de 2010, siempres que sían obres musicales de creación orixinal.

Queden escluyíes les pieces tradicionales yá esistentes, les versiones o adaptaciones d'obres de creación publicaes orixinalmente n'otra llingua, y los cantares que nun fueren editaes y grabaes per vegada primera nel citáu añu 2010.

Hasta'l día 21 de xineru ta abiertu'l plazu pol que los intérpretes o grupos pueden solicitar la so participación, indicando'l cantar qu'escueyen p'allegar al premiu. Un xuráu formáu por espertos en música y llingua asturiana va escoyer d'ente los presentaos a los cinco finalistes, que van actuar en directo na Gala d'Entrega del Premiu, que se va celebrar nel Auditoriu de la Casa de la Cultura "Teodoro Cuesta" (Mieres) en febreru y cola retresmisión de la Televisión del Principáu d'Asturies (TPA).

Liet Internasjonaal
El grupu o intérprete ganador na presente edición va representar internacionalmente a Asturies nel Festival del Cantar en Llingües Minoritaries (Liet Internasjonaal), entamáu col sofitu del Conseyu d'Europa.

Tola información sobre esta y les pasaes ediciones del Premiu al Meyor Cantar va tar disponible nel sitiu web, www.premiumeyorcantar.es, que va ufiertar noticies, fotografíes ya información sobre los grupos y cantares finalistes. Amás d'ello, un reproductor va dexar escuchar les temes que van competir na Gala.