Cultura contabiliza 14.566 horros, paneres y cabazos con proteición a falta de completar el censu

Los primeros datos de la primer base de datos unificada del conxuntu d'horros, paneres y cabazos protexíos n'Asturies da una cifra de 14.566 bienes d’esti tipu. Esta cantidá va aumentar, yá que non tolos conceyos fixeron entá’l trabayu de catalogación d’esti patrimoniu etnográficu nos sos territorios.

La Conseyeria de Cultura, Política Llingüística y Turismu presentó ayeri na Mesa del Horru los resultaos d'un trabayu fechu a lo llargo del 2020 que se concreta na configuración de la primer base de datos unificada del conxuntu d'horros, paneres y cabazos con proteición patrimonial nel país. Amás, l'organismu patrimonial empecipió l’alderique sobre'l cambiu de la normativa que regula estos elementos etnográficos cola mira de completar y aprobar la parte téunica que, ente otros aspeutos, ta venceyada a los sos posibles usos nuevos.

La base de datos rexistra un total de 14.566 bienes, toos ellos incluyíos nos catálogos urbanísticos municipales, a falta de que 18 conceyos faigan el so llabor de catalogación. “Esti trabayu constitúi’l primer aproximamientu solvente y rigorosu pa conocer el númberu d'estos elementos etnográficos n'Asturies”, espliquen dende Cultura.

Borrador avanzáu

Na xunta de la Mesa del Horru, presidida pola conseyera Berta Piñán, presentóse tamién un borrador yá avanzáu pal empiezu del cambiu normativu que regula esti patrimoniu etnográficu y que tiende a facilitar usos nuevos n'horros y paneres con proteición parcial, cola mira de favorecer la so reutilización y la so utilidá. Estos usos alternativos a los tradicionales habrán respetar los valores culturales del elementu etnográficu y favorecer el so caltenimientu.

Amás, el cambiu normativu que plantega la conseyería reduciría de forma notable los trámites d'autorización pa obres de caltenimientu que caltengan les carauterístiques orixinales d'horros y paneres. El borrador propón tamién qu'estes actuaciones puedan ser autorizaes directamente poles alministraciones locales, ensin necesidá d'un informe específicu de Patrimoniu Cultural, siempre que s'afaigan a una serie d'indicaciones que se van recoyer na mesma normativa.

Piñán informó d’igual forma sobre la puesta en marcha d'una iniciativa que va dexar depositar nun almacén habilitáu pola Fundación Cetemas pieces procedentes d'horros y paneres desmontaos de resultes de declaraciones de ruina, valtamientos o otros accidentes, que se van poner de baldre a disposición d’interesaos n'aprovechar estes pieces na restauración d'otros elementos etnográficos de naturaleza similar.

Na semeya, un horru nos Teixóis.