Cuenta atrás pal Conciertu pola Oficialidá

Los organizadores del Conciertu pola Oficialidá qu'entama la Xunta Pola Defensa de la Llingua Asturiana y que va tener llugar el próximu sábadu nel aparcamientu del Campus d'Humanidaes de La Vega presentaron güei oficialmente tolos datos sobre l'acontecimientu, pal que la venta d'entraes avanza a bon ritmu. Los representantes de la Xunta Pola Defensa de la Llingua esplicaron na rueda de prensa que-yos prestaría qu'esti fuere "l'últimu conciertu que tengamos qu'organizar pola oficialidá" y que'l del añu qu'entra fuere'l del "conciertu pol asturianu"

Una carpa de más de 1.000 metros cuadraos va atechar a los asistentes a un conciertu que tolos años intenta amestar dalgo nuevo a la cenciella socesión de grupos enriba del escenariu. Pa ello, esti añu la Xunta va poner dos escenarios en cuenta d'ún a oxetu de repartir les actuaciones y quitar los tiempos muertos, ello amás d'otres novedaes como proyecciones de vídeu p'animar l'ambiente. Con too y con ello, por tratase d'un conciertu, l'auténtica noticia ta nos grupos que van tocar. Asina, pel escenariu "grande" van pasar los grupos de folk La Bandina, N'Arba y Felpeyu xunta Skontra y Skama la Rede, mientres que pel escenariu "B" van poder vese les propuestes musicales del proyectu de hip-hop n'Asturianu "K-Nalón" y del grupu de folk instrumental con bases rítmiques de "Xera" amás de l'actuación de les pandereteres de "Dulcamara". Sobre'l cartel de grupos, los representantes de la xunta Pola Defensa de la llingua comentaron que ye un cartel "variáu y plural" y qu'espeya tolos estilos de música que se faen n'asturianu agora mesmo.

D'otra manera, la organización cuenta con poder tener, sacantes problemes d'última hora, les primeres unidaes del CD-Single "Fala" preparaes pa repartir esa nueche. Como yá adelantare Asturies.com "Fala" ye'l resultáu d'una iniciativa conxunta del colectivu "Músicos pola oficialidá" la casa de discos avilesina "L'Aguañaz" y la Xunta pola Defensa de la Llingua, consistente nun Cd-single con ún solu tema musical que quier ser un nuevu himnu pa la reivindicación de la oficialidá del asturianu y la normalización del idioma. Tres de "Fala" tan delles de les mayores estrelles del panorama musical asturianu, cola plantiya de Dixebra cásique entera -Xune Elipe, Fernando Rubio, Javi Rodríguez y Primi Abella- amás de músicos del grupu "Tarañu" o'l cantautor Toli Morilla, anque la nómina de participantes nesti nuevu esperimentu musical ye entovía muncho más llarga, contándose con especialistes de distinta formación. Con esti amiestu d'influyencies y tendencies, sabiamente remanáu pol productor Sergio Rodríguez, responsable de los últimos trabayos de Dixebra o La Bandina, el resultáu promete ser de lo más rompedor, y los responsables del proyectu adelantaron a Asturies.com que va tratase d'un tema "nel que va mandar el soníu funky y que tamién va tener estribillos rockeros".

La Xunta pola Defensa de la Llingua va aprovechar tamién la ocasión pa presentar materiales promocionales nuevos en forma de camisetes, pegadielles y otros que van poder mercase per primer vegada nel conciertu.