Cuatro deportistes asturianos van lluchar por medaya nos Xuegos Paralímpicos de Londres

Esti miércoles, a les 21.30 hores –20.30, hora llocal–, va tener llugar la ceremonia inaugural de los Xuegos Paralímpicos de Londres. Asturies va tar representada n’Inglaterra por cuatro deportistes con opciones de medaya.

L’Estadiu Olímpicu de Londres va acoyer l’espectáculu ‘Enlightenment’ –illuminación n’asturianu– pa la ceremonia inaugural, que va contar con 3.000 figurantes y que promete tar al nivel de la de los Xuegos Olímpicos. L’encendíu del pebeteru dará pasu a nueve díes de competición –hasta’l 9 de setiembre– nos que 4.200 atletes con discapacidá de 166 estaos van participar nun total de 21 disciplines.

Cuatro deportistes asturianos algamaron, col so esfuerzu y dedicación, la posibilidá de competir nos Paralímpicos de Londres, los decimocuartos de la historia. Los atletes Alberto Suárez Laso y José Manuel González Santamarta ‘Santa’, el remeru Juan Pablo Barcia y la llevantadora de pesu Loida Zabala, nacida n’Extremadura anque afincada nel país, componen la delegación asturiana n’Inglaterra. Los cuatro van competir duro por algamar dalguna o delles medayes, con más opciones pa Suárez Laso y ‘Santa’. El primeru, con deficiencia visual, ye recórman mundial de maratón y campeón del Mundu na disciplina, bronce nos 10.000 y campeón d’Europa nos 5.000 metos. En Stratford va competir na maratón y nos 5.000. Mentes, Santa, un veteranu nos xuegos –éstos van ser los sos sestos Paralímpicos, nos que suma una plata y trés bronces–, va participar nos 400 y nos 800 metros. El xixonés, con una paralís cerebral, foi bronce nos 800 y nos 1.500 metros nos Mundiales últimos.

Pa Barcia van ser los segundos xuegos tres la so esperiencia en Beixín, onde una lesión impidió-y lluchar pola medaya. En Londres va competir nos 1.000 metros skiff individual. Tamién repite Zabala, sétima en China, que va participar n’halterofilia adaptada en menos de 48 quilos.