CSI y SUATEA van recurrir les oposiciones a la TV autonómica

El procesu de creación de la TV asturiana sigue atropando'l malcontentu d'organizaciones y entidaes de distintos ámbitos. Amás de la denuncia que la Xunta Pola Defensa de la llingua presentare esta selmana pela vía alministrativa, la central sindical Corriente Sindical d'Izquierdes (CSI) y el sindicatu d'enseñanza SUATEA dieron anuncia de que tan preparando un recursu que van presentar nos xulgaos en pasndo'l mes d'agostu, que nun se considera hábil a efectos xudiciales. Los sindicatos enfótense en poder paralizar con esti contenciosu un procesu d'oposiciones que yá ta en marcha y pal que los exercicios deberíen celebrase aproximadamente pa la parte d'ochobre.

El recursu conxuntu de CSI y SUATEA sorraya en primer llugar que la convocatoria de les places valta'l el principiu de publicidá nos procedimientos de provisión de los puestos de trabayu al apautar que la contratación de personal fixu pa places que se convoquen nel futuru y que nun s'incluyan nes convocatories que se fexeron agora cuenten con facese ensin convocatoria pública nueva y tirando de los aspirantes procedentes de les convocatories actuales. Ello, al paecer de los sindicatos, fai posible'l que se contrate en númberu superior al de places convocaes y va contra l'articuláu de la mesma llei de Medios de Comunicación Social pola que se manda l'Ente de comunicación, que diz que la contratación de personal fixu ha facese per aciu de convocatoria pública y acordies colos principios d'igualdá, méritu, capacidá y publicidá. La escepción que se propón nes bases de la convocatoria, pudiendo convocase pa places futuribles esclusivamente a los aspirantes a les actuales valtaría toos estos principios, al paecer de los dos sindicatos.

Les convocatories de places pal Ente de Comunicación diríen tamién contra'l Reglamentu de Selección y Ingresu de personal que se manda pol Decretu 68/1989, que diz que tololos procedimientos d'ingresu a puestos públicos con calter definitivu han facese per aciu de convocatoria pública qu'ha de regular el númberu y característiques de les places convocaes y la prohibición de contratación en númberu superior al de places convocaes. Contra ello, les bases sesta, octava y novena de la convocatoria, según la denuncia de CSI y SUATEA, apauten que'l númberu final de persones que superen los exercicios teórico - prácticos puea ser superior al de places convocaes, una circunstancia que va contra'l principiu constitucional de publicidá nel accesu al emplegu públicu, polo que los sindicatos piden la nulidá "de plenu derechu" de la convocatoria.

Un segundu bloque de la denuncia de CSI y SUATEA céntrase na cuestión de la llingua asturiana, atendiendo a lo que diz la mesma Llei de medios de Comunicación, qu'esplica que la difusión del asturianu ha ser ún de los principios de la TV. Pa los sindicatos "Resulta una conclusión evidente que l'usu del asturianu al traviés de los medios públicos de comunicación esixe que lu conozan previamente los profesionales de la información encargaos de les funciones de difusión, como requisitu imprescindible pa que tal usu y difusión sían materialmente posibles y non una declaración d'intenciones vacia". CSI y SUATEA dicen que de nun contemplase l'asturianu nes bases como requisitu pa los aspirantes ello atentaría tamién "flagrantemente" contra'l principiu xeneral del artículu 19.1 de la Llei de Bases de la Función Pública, qu'apauta que los procesos de selección han garantizar que les prebes selectives concueyen col puestu de trabayu a desempeñar. Pa CSI y SUATEA si l'asturianu ha ser un de los oxetivos de la TV como diz la so llei fundacional, nun tien xustificación que les 25 places de redacción convocaes nun lo pidan, en cuantes qu'asina nun pue garantizase un usu afayadizu de la llingua asturiana na radio y televisión públiques . L'ausencia total de los conocimientos de llingua asturiana nes bases entiéndese dende CSI y SUATEA como un actu de mala fe o d'indixencia intelectual, asegurando que pa ello nun tien que ver el que tea reconocioda o non la oficialidá.

Otramiente, la esistencia d'una preba obligatoria y eliminatoria n'inglés o francés merez tolos descalificativos de los dos sindicatos denunciantes, qu'aseguren qu'ello ye una "arbitrariedá manifiesta" que va contra la llei reguladora de los Medios de comunicación social d'Asturies, contra'l principiu d'adecuación de les prebes a les funciones a desempeñar "y contra'l sentíu común".

A la fín, un tercer bloque de la denuncia de CSI y SUATEA asegura que se da una Indefensión de los aspirantes a los puestos de trabayu en cuantes que les convocatories omiten "de forma inxustificada y illegal" la posibilidá de recurrir alministrativamente contra les mesmes acordies cola Llei de Réxime Xurídicu y Procedimientu Alministrativu Común. Pa les organizaciones sindicales el tapecer esta posibilidá de rcursu ye grave enforma en cuantes que la parte convocante de les places de trabayu ye un Ente que tien una naturaleza xurídica "especial" que s'asitia ente'l derechu priváu y l'alministrativu, cosa que los sindicatos interpreten como una "maniobra de confusión".