CSI y SUATEA convoquen mañana una manifestación en Xixón

El sindicatu CSI y el sindicatu d'enseñanza SUATEA convoquen pa mañana una manifestación en Xixón baxo'l llema "Trabayu pa toos y toes y n'Asturies". La marcha cívica va facese en protesta pola situación actual del país, qu'estes organizaciones camienten que ye "el desmantelamientu industrial d'Asturies" la política de privatizaciones y la emigración de la mocedá. Ente les reivindicaciones de la marcha, amás de desixir un apueste "pol caltenimientu del emplegu y de les empreses n'Asturies" va tar tamién el seguru de paru y la Renta Básico.

Les organizaciones convocantes concueyen na so interpretación de l'actual situación d'Asturies, y asina ye que pa elles anque Asturies tien un nivel altu de renta gracies a les prexubilaciones y les ayudes pa zarrar industries, pozos y ganaderíes, ello fai que s'escuenda'l problema del desmantelamientu xeneral, del ermu de pueblos y comarques y de la mengua de la población, ello pese a la llegada d'inmigrantes. De fechu, CSI y SUATEA argumenten na convocatoria qu'esiste un oxetivu políticu del que responsabilicen al PSOE consistente en menguar la población d'Asturies hasta asitiala nes 700.000 persones.

El manifiestu de la convocatoria fai predicción del futuru d'Asturies y esplica que'l país "pue cayer en barrena cuando escosen les prexubilaciones y nel momentu que queramos reaccionar va ser tarde , por eso ye güei fundamental decatase y denunciar la propaganda del Gobiernu d'Asturies, que quier facenos creyer qu'Asturies va bien y que vamos camín d'una Asturies que progresa de la mesma mena que'l restu del Estáu Español y qu'Europa" Pa CSI y SUATEA "El Gobiernu d'Asturies nun igua nengún d'estos problemes que se tán viviendo n'Asturies y namás que fai qu'aceutar les reconversiones que traen despidos, reducciones de plantiyes, pieslle de pozos, pieslle d'empreses, y pieslle d'esplotaciones agraries, ganaderes y de pesca"