CSI esixe dimisiones pol casu de Xurde Blanco

En rellación al casu del lletráu Xurde Blanco, al que l'alministración-y negó un permisu pa poder operase por tar escritu n'asturianu, el sindicatu CSI emitió una nota de prensa na que califica la negación de permisos y otres piticiones al funcionariu de "práctica de represión" y defende'l "llexítimu exerciciu del derechu que-yos reconoz la Llei d'Uso del Asturianu y la Carta Europea de les Llingües Minorizaes" a usar l'asturianu nes sos comunicaciones cola alministración.

Vistes les consecuencies y característiques del casu de Xurde Blanco, la Corriente Sindical d´Izquierda pidió-y al presidente del Gobiernu asturianu'l "cese inmediatu de los responsables políticos d'esta persecución inalmisible". En concreto, CSI pide la dimisión de la Conseyera de la Presidencia María José Ramos, como titular de la Conseyería na que se dieron los fechos "que, por continuaos y sistemáticos paez que respuenden a un plan premeditáu pa denigrar a la llingua asturiana y los sos falantes" y, en segundu llugar, pide tamién la dimisión del Director Xeneral del Serviciu Xurídicu, Cabaleiro Teijeiro "como executor directu de los actos de represión del usu de la llingua".


El sindicatu Corriente Sindical d´Izquierda denuncia igualmente lo que califica de "hipocresía y doble moral que caracteriza l'actuación del Gobiernu asturianu nel so conxuntu no tocante a la promoción y protección de la llingua asturiana" en cuantes que "mientres cola boca pequeña promete potenciar el so usu y facilitar el so empléu énte l'Alministración Pública, na práctica actúa colexadamente como brazu executor pa reprimir a quien llibremente quier exercer el so derechu a escribir y falar na so llingua".