CSI Educación denuncia los primeros casos de centros que nun ufierten l’asignatura de Llingua Asturiana

Magar qu’entovía nun s’abrió’l plazu de matriculación, son munchos los centros que yá tán ufriendo les materies que los alumnos pueden escoyer pal cursu próximu. CSI Educación denuncia que yá tien constancia de dalgunes escueles onde nun se ta ufiertando Llingua Asturiana y Lliteratura baxo delles escuses.

En Secundaria y Bachilleratu l’asignatura compite con una segunda llingua estranxera o con otres como Informática o Cultura Clásica, situación na que nun “tendría d’atopase esta materia, pero nun podemos dexar a un llau el marcu llegal nel que nos movemos”, espliquen dende’l sindicatu. En munchos colexos, sobre manera concertaos, yá tán presentando a los estudiantes les posibilidaes coles que cuenten y “tamos empezando a conocer casos de centros qu’apuesten por nun ufiertar Llingua Asturiana al alumnáu de dalgunos niveles, plantegando escuses de toa triba: dende la falta de profesoráu hasta la imposibilidá horaria”, alerten.

Corriente Sindical d’Izquierda (CSI) Educación recuerda que “tolos centros tienen la obligación de facilitar a les y los estudiantes la posibilidá de cursar la materia de Llingua Asturiana”, polo qu’esixe a la Conseyería d’Educación, “y en casu de ser necesario a Inspeición Educativa, que faiga cumplir la normativa vixente y garantice’l derechu de tol alumnáu d’Asturies a estudiar Llingua Asturiana (o Gallego-Asturiano nos centros del Eo-Navia)”. Asina, propón como midida l’unvíu d’una circular oficial pa informar de la situación, plantegando depués sanciones nel casu de que nun se cumpla cola normativa.

Pa finar, asegura que “l’aprobación de les especialidaes docentes de Llingua Asturiana y Gallego-Asturiano, xunto a la declaración d’oficialidá d’estes llingües y el so estudiu de manera troncal, sedríen les soluciones afayadices pa poner fin a esti tipu de discriminaciones y ameyorar la situación de docentes y estudiantes”.

Na semeya, CSI nuna manifestación pola oficialidá del asturianu y del gallego-asturiano.