CSI convoca una concentración contra la privatización de Caxastur

La Corriente Sindical d’Izquierda (CSI) va movilizase esti miércoles, a les 17 hores, frente al Reconquista pa protestar contra la privatización de Caxastur. L’hotel uviedín va acoyer l’asamblea xeneral de la caxa asturiana.
 
Nesti aconceyamientu se pretende “aprobar el trespasu del negociu financieru de la caxa al Bancu Base resultante de la fusión de Caxastur, CAM, Caja Cantabria y Caja de Extremadura”, señalen dende’l sindicatu. Unos planes que podríen camudar al rompese a última hora de güei l’alcuerdu entre Caxastur y Caja Mediterráneo (CAM).
 
El sindicatu asturianu asegura que la intención d’esta fusión nun tien otra razón que la privatización de les caxa d’aforros “previu esguace financiáu con perres públiques”. “La decisión de trespasar el negociu financieru de Caxastur representa un pasu más nesta carrera lloca hacia una privatización que namái va beneficiar a la gran banca y a los especuladores internacionales que pretenden, per un lláu, eliminar la competencia d’unes entidades financieres nes que los sos beneficios revierten na sociedá y, pel otru,  cola ayalga de los restos de les caxes d’aforros”, añade nun comunicáu.
 
CSI defiende la creación de “una banca pública fuerte que busque’l beneficiu coleutivu y que se preocupe de la situación de los millones de persones afogaes pol desemplegu, la precariedá, los salarios baxos y los recortes sociales”. Tamién esixe “que’l dineru públicu que, mediante’l FROB, ta invirtiéndose nes caxes nun tenga como fin preparales pa la privatización. La utilización de les perres públiques nes caxes tien que ser parte d’un proceso de blindaxe contra esa privatización que, en too casu, tenga como final la so nacionalización y non el regalu a los especuladores”