CSI, CGT, CNT y SUATEA manifiéstense en Xixón “contra los recortes y pola fuelga xeneral”

|

La plaza de L’Humedal va ser el puntu de partida de la manifestación “contra los recortes y pola fuelga xeneral” prevista esti miércoles, a les 19.30 hores, en Xixón. Convoquen los sindicatos CSI, CGT, CNT y SUATEA.

Esta protesta, que coincide cola xornada de fuelga xeneral n’Euskadi y Navarra, naz cola intención de dicir al poder “que tamos fartos; qu’esto nun pue continuar; que la situación que viven millones de persones n’España, con precariedá, con despidos, con retirada de los servicios públicos y retirada d’asistencia sanitaria a una parte de la población, y con elimación de derechos a estudiantes y a paraos, tien qu’aparar”, señaló Beatriz Quirós, representante del Sindicatu Unitariu y Autónomu de Trabayadores de la Enseñanza d’Asturies (SUATEA) na rueda de prensa de presentación de la convocatoria. Nel ámbitu educativu, el que trabaya’l so sindicatu, apuntó que “vamos sufrir, amás de los recortes que tamos padeciendo” y que tán llevando al profesoráu y al alumnáu a una situación estrema, “una llei d’educación que nos vuelve al franquismu; a una escuela segregadora”.

Jorge Muñiz, de la Confederación General del Trabajo (CGT), recordó que’l sindicalismu alternativu asturianu lleva cuatro años convocando delles manifestaciones añales asemeyaes a la de güei p’amosar el so descontentu y calificó la situación actual de “dramática”, tanto pa los servicios públicos como pa la industria asturiana. Por eso señaló la necesidá de dir a un “conflictu ampliu y a una fuelga xeneral” cola intención del que’l Gobiernu estatal del PP vuelva p’atrás nes sos intenciones y que’l “dineru público sía utilizáu pa lo público”. Pa finar la so intervención, recordó la convocatoria que fixo recién el so sindicatu de fuelga xeneral de calter estatal pal 31 d’ochobre y refugó’l referéndum sobre los axustes solicitáu poles centrales mayoritaries.

L’últimu en tomar la pallabra foi Samuel Fernández, representante de la Corriente Sindical d’Izquierda (CSI), p’afirmar qu’hai “causes suficientes pa dir a la fuelga xeneral”.Recordó que n’Asturies hai 100.000 paraos, de los que 70.000 nun tienen subsidiu por desemplegu o reciben namái 400 euros, amás de “la represión” en toles movilizaciones asocedíes n’Asturies en defensa de los puestos de trabayu en mou de sanciones y detenciones. Tamién recriminó que nun se metieran “colos banqueros y colos especuladores que tán robándonos tol dineru” y llamó a la ciudadanía a participar nésta y nes movilizaciones próximes previstes.

La delegación del Gobiernu estatal n'Asturies quier prohibir la protesta

Dende la CSI denunciaron esta mañana les torgues que ta poniendo Gabino de Lorenzo pa la celebración de la manifestación d'esta tarde. Representantes del sindicatu acudieron a a una citación policial na que-yos informaron de la negativa de la Delegación del Gobiernu estatal n'Asturies a la celebración de la protesta, énte lo que respondieron con tolos permisos reglamentarios cumplimentaos en tiempu y forma. La Policía remitió a los convocantes a unviar tolos documentos a Uviéu. Pese a estes amenaces, la CSI aseguró que la manifestación "va facese sí o sí".

 

Contador Estadistiques