Crítiques al Plan Forestal d'Asturies

La Coordinadora Ecoloxista d'Asturies, que yá criticare la otra selmana'l Plan Forestal d'Asturies por tar fechu a la midida de los intereses del sector madereru, denunció esta selmana que'l Plan Forestal acabante d'aprobar carez d'una "visión integral del monte y nun tien respetu nengún pa colos los principios del desarrollu sostenible" centrando la crítica na xuba de la superficie dedicao a pinu y ocalitu y a la falta de previsión nel tema del fueu

Según los ecoloxistes, el plan diseña una planificación forestal que s'enconta nel monocultivu del pinu, especie que según les previsiones del plan va ocupar una superficie de más del 204% respective a les 40.000 hectárees qu'ocupa agora, mientres que l'ocalitu tamién va xubir en superficie, anque menos, un17%, sobre les más de 50.000 hectárees que toma anguaño.

Contra ello, el Colectivu quéxase de que los árboles de viesca autóctono (carbayu, castañal etc) que pasen per una situación de perda de superficie, namás van tener una xuba de superficie del 50,8% respective al volume qu'ocupen agora.

El colectivu denuncia qu'esta medra de les coníferes y los ocalitos vien tamién acompañada de la creación "cientos de kilómetros de pistes, tornafueos y infraestructures de toa triba pel monte". Otru aspectu paralelu que demostraría la falta de xacíu sedría'l que tola plantación d'especies foriates fadríase intensivamente sobre'l 70% del territoriu d'Asturies que queda fuera de la zona PORNA, onde los criterios de repoblación son más estrictos. Con ello, al paecer del grupu conservacionista convertiríense montes enteros en "metros cúbicos de madera"

Un aspectu que los ecoloxistes dicen que nun ta tratáu en plan ye que lo más de la repoblación va facese con especies "mui inflamables" casu de los pinos y ocalitos, Asturies conviértese nun "polvorín" neto que pasa en Galicia que prende peles cuatro esquines "por culpa del modelu forestal ultraproductivista que se tien nuna sola especie: el pinu

Los ecoloxistes apurren datos sobre'l dañu del fueu nos pinares, y espliquen que de les 40.000 hectárees que tenemos agora dende va 12 años p'acá quemaron dafechu cerca de 25.000 (el 62% del total), xunta otres 10.000 d'ocalitu (20% del total) mientres que les especies asturianes presenten una resistencia al fueu muncho mayor. De cumplise les previsiones del plan forestal, la proporción d'especies asturianes y especies de fuera, agora favorable a la viesca del país, entornaría dafechu.