Cristino Ruano defende que los coches nun entren a llugares protexíos

El director de Recursos Naturales del Gobiernu asturianu dio anuncia na Feria de Muestres de Xixón d'una reforma del PORNA que va atender a la meyora de la protección de les especies vexetales.

El director de Recursos Naturales asturianu defendió nesti sentíu que ye preciso adoptar la mesma tendencia a desaniciar los coches particulares de los espacios protexíos que se da n'otros llugares d'España, defendiendo que sía'l tresporte públicu, como yá se fai na carretera a los Llagos, el qu'atienda les necesidaes turístiques. En cualquier casu, respective al corte al tráficu que posíblemente se faiga na carretera del Cares, reconózse que ye preciso estudialo con precuru en cuantes qu'esa carretera lleva tamién a llugares habitaos

El director de Recursos Naturales dio un repasu a la situación de les especies en peligru d'estinción, afirmando que mientres l'osu espoxigó en númberu d'exemplares y espardióse per un área mayor, el faisán montés, acabante de declarase especie en peligru d'estinción, pasa per una situación crítica. L'esfuerzu con esta especie va centrase nuna primer fase en llevar alantre un bon protocolu de seguimientu de los exemplares que queden y na ellaboración d'una cartografía del hábitat pa la especie, anque Ruano llegó a proponer el futurible de la clonación d'exemplares de faisán gracies al bancu xenéticu del SERIDA.

Otramiente, Ruano dio anuncia de que ta preparándose una revisión del Plan d'Ordenación de los Recursos Naturales d'Asturies (PORNA) que va presentase pa la parte d'ochobre y na que se ta mirando que la futura rede d'espacios naturales protexíos tenga un órganu de xestión únicu. Otra de les novedaes que van asoleyase cola refiorma del PORNA va rellacionase col mundu vexetal, institucionalizándose programes de xestión de plantes invasores y ellaborándose un catálogu únicu de la fauna y tamién de la flora asturianes. Ello ye que, anque'l 35% de lasuperficie del país cuenta con dello de protección oficial, les categoríes de protección esistentes nun atienden específicamente a les especies vexetales que tan en situación endémica o riesgu de desaniciu.