Crisis nel gobiernu catalán

La entrevista del Conseller en Cap de la Generalitat de Catalunya Josep Lluis Carod-Rovira con dirixentes de la banda terrorista ETA ta teniendo graves consecuencies polítiques. La información sobre la entrevista dábala ayeri en portada'l diariu ABC, qu'aseguraba que Carod Rovira falare en secreto con ETA pa pidi-y a la organización que dexare d'atentar en Cataluña a cambiu de sofitar les reivindicaciones del independentismu vascu.



El conseller y dirixente d'Esquerra Republicana de Catalunya confirmó a última hora de la mañana d'ayeri qu'esistió tala entrevista y que nun informare d'ello a los sos socios de gobiernu, pero negó qu'apautare con ETA l'abandonu de l'actividá en Cataluña. En declaraciones al programa "La Ventana" de la cadena Ser, Carod Rovira dixo qu'elli siempre se ofreció a falar con quien fuere y recordó la so participación nes negociaciones pa que Terra Lliure dexare les armes. Carod desmintió que la entrevista se desarrollare nos términos que diz ABC, esclariando que nun se llegó a alcuerdu nengún y qu'elli mesmu nun contaba "con que se produxeren milagros" anque esperaba que la organización pudiere facer daqué anuncia de tregua.



En conociéndose que la entrevista se ficiere, Carod-Rovira punxo'l cargu a disposición del Conseller Maragall, que refugó la dimisión de Carod pero que-y retiró les competencies de representación del gobiernu Catalán nel esterior. A les 11 de la nueche, el secretariu xeneral del PSOE, José Luis Rodríguez Zapatero, contradicía la decisión de Maragall y esixía-y qu'aceptare la dimisión de Carod-Rovira. La solución definitiva a esta situación tendrá de sabese a lo llargo d'esta tarde, en que Maragall y Carod-Rovira van dar caún una rueda de prensa definitiva sobre'l tema, que güei monopoliza la portada de tolos medios estatales de comunicación. El cese de Carod Rovira ye una posibilidá, anque'l PSC, sociu mayoritariu del gobiernu catalán, nun ve que tenga que valtase'l tripartitu. Información actualizao nel diariu catalán Vilaweb

Esta mañana tan apaeciendo reacciones de tolos signos políticos a la crisis catalana. Ente elles, la d'ún de los barones del PSOE, Chaves, que pidió la dimisión de Carod, mientres que dende Asturies la FSA condenó l'actuación de Carod Rovira porque esa negociación nun pue facese "dende un ámbitu territorial". Más dures son les crítiques dende'l PP, llegando Mariano Rajoy a dicir que lo que fizo Carod ye delitu. Dende Euskadi,el conseyeru de Xusticia Joseba Azkarraga acusó a los servicios secretos d'espiar a dirixentes democráticos y a partíos políticos, apoyando a Carod-Rovira y calificando les crítiques a la so persona como "muestra de cinismu". El coordinador d'IU-EB Javier Madrazo calificó la situación de "caza de bruxes". Dende l'ámbitu xudicial, el fiscal xeneral del Estáu Jesús Cardenal, alvirttió que nun va actuar contra Carod-Rovira al estimar que lo que fizo nun constitúi delitu dengún.