Crimen políticu n'Holanda

Ayeri pela tarde asesinaron a tiros a Pim Fortuyn, líder de la estrema derecha holandesa y ex-líder del partíu ultra lliberal "Leefbar Nederland" (por una Holanda en que se pueda vivir), recuperáu pa la política tres el trunfu nes pasaes elecciones municipales. En medio de la fola de derechización que vive Europa, Fortuyn llegaba a les lexislatives con traza de llevar un resultáu curiosu, y depués de facer plaza fuerte nes municipales de la ciudá de Rotterdam, contaba con sacar a lo menos venti escaños de los 150 qu tien el paralamentu holandés. L'asesinatu vien a emporcar la campaña electoral y puede obligar a un retrasu na fecha de la elección.

El personaxe de Fortuyn estraña un poco en comparándolu con otros líderes de la estrema derecha europea. Llicenciáu en socioloxía, Fortuyn yera simpatizante de la etnia xudía, masacrada cuando la ocupación nazi pero que tien una comunidá importante n'Holanda. D'otru llau tarrecía la cultura islámica, un noxu que supo esplotar electoralmente. La so condición d'homosexual y misóxinu enemigu declaráu de la muyer acaben de completar un perfil abondo raru pa lo que s'espera d'un ultraderechista.

La web ta estrada de sitios rellacionaos con esta noticia. Ente les fontes más directes, citar el web del so antiguu partíu Leefbar Nederland, que puede confundir al visitante ocasional con un logotipu que casi parez el d'un grupu ecoloxista. Tamién el web de la llista de Fortuyn, que yá ta puestu en clave de funeral. Ente los medios d'información holandeses rescampla'l serviciu de Radio Neederland, qu'emite boletines en dellos idiomes.