Crítiques al llabor de la Conseyería de Xusticia nel accidente de L.lena

El sindicatu Corriente Sindical d'Izquierdes emitió güei un comunicáu de prensa en que critica la falta de coordinación de la estaya del Gobiernu asturianu, que nun prendió'l nivel 1 del Plan Territorial de Protección Civil dempués del accidente del pasáu día 16 d'un autocar en L.lena nel que se rexistraron 4 víctimes mortales

El sindicatu agradez "a cuantes persones participaron nel rescate" la so actitú personal y profesional pero critica l'actuación de la Conseyería de Xusticia, Seguridá Pública y Rellaciones Esteriores, y a la Dirección Xeneral de Seguridá Pública por nun prender el Plan Territorial de Protección Civil d'Asturies en casos d'emerxencia. Esti plan tien cuatro niveles de gravedá y supón la movilización y coordinación de tolos organismos d'emerxencia d'Asturies, siendo, según comenta la CSI, responsabilidá directa del Conseyeru la so activación, qu'a la CSI abúlta-y que tuvo que facese nel nivel 1 pa poder obtener, centralizar y apurrir tola información relativa a posibles afectaos y contactos familiares.

Según el sindicatu, esa función "falló" al nun activase'l plan, llevando a les families a una situación caótica por causa de que nun sabíen en qué hospital de los trés ente que se repartió a les víctimes taben los sos fíos y parientes accidentaos, siendo los mesmos médicos responsables de los centros de salú los que tuvieron d'informar a les families. El sindicatu diz que, énte la inoperancia naquellos momentos de la Conseyería, rescampla l'actitú del Conceyu de Xixón, que prendió los sos propios protocolos y punxo tolos medios a disposición de les families, dende información hasta coches pa treslladase al hospital.