Crítiques a les subvenciones a organizaciones xuveniles del Institutu Asturianu de la Mocedá

El BOPA d'esti 23 d febreru recueye la convocatoria de subvenciones p'asociaciones xuveniles qu'entama tolos años l'Institutu Asturianu de la Mocedá. Entidaes oficiales como'l Conseyu de la Mocedá del Principáu d'Asturies (CMPA), al traviés del so presidente Paulino Feito, y organizaciones xuveniles como Mocedá d'Izquierda Asturiana (MIAS), venceyada al partíu políticu Izquierda Asturiana, denunciaron que la convocatoria ta marcada pol pesu d'una "censura" que s'atecha en "supuestos motivos técnicos" que se camienta que son en realidá una sida "pa exercer na práctica derechu de vetu" una denuncia na que coinciden el presidente del CMPA y MIAS.

El puntu más polémicu de la convocatoria d'ayudes ta en que se-y dea autoridá a la directora del Institutu Asturianu de la Mocedá pa "interpretar y resolver cuantes cuestiones surdan de l'aplicación d'estes bases y pa que dicte les resoluciones complementaries necesaries pal desarrollu y cumplimientu de les mesmes, incluyida l'aceptación de les posibles modificaciones qu'afecten a los proyectos". CMPA y MIAS albidren qu'esta redacción va permitir que l'IAM caciplen arbitrariamente nos proyectos que se-yos presenten.

Otramanera, MIAS denuncia tamién que la convocatoria especifica qu'aquellos proyectos que cuenten con una subvención igual o mayor del 20% del total del coste han concedé-y a la TV autonómica la comunicación pública de les actividaes subvencionaes, dalgo que pa la Mocedá d'Izquierda Asturiana constitúi "una intromisión forciada, obligada ya inalmisible na privacidá y na propia imaxe de les actividaes desendolcaes poles asociaciones".