Coxersa va constituyir los sos órganos de gobiernu ante les protestes de vecinos, ganaderos y ecoloxistes

Esti martes va tener llugar l’aconceyamientu del que van salir los órganos de gobiernu de Coxersa. Fuera de les instalaciones de Serín, ta convocada una protesta a la llegada de los gobernantes contra la planta incineradora.
 
Tres los cambios producíos nel Gobiernu y nos conceyos tres les eleiciones, llega’l momentu de cambiar los órganos de gobiernu del Consorciu pa la Xestión de los Residuos Sólidos n’Asturies (Coxersa) y sustituyir a Francisco González Buendía como presidente. Asina, a les 17 hores de güei, ta previsto l’entamu d’un aconceyamientu que se presume tensu pola situación política d’Asturies. El Gobiernu tien una representación del 20 por cientu nel conceyu d’alministración de Coxersa, mentes que’l 80 por cientu restante ye de los conceyos.
 
Esti conseyu d’alministración nuevu va ser l’encargáu de decidir el futuru de la planta incineradora prevista en Serín, que tovía nun tien estudiu d’impautu ambiental, proyeutu económicu nin plan de residuos que lo soporte. Por ello, vecinos y ecoloxistes convocaos pol Conceyu contra la Incineración, la Plataforma de Ganaderos Afectaos pola Incineradora y el Grupu de Trabayu Mediu Ambiente del 15-M de Xixón, van manifestase a les 16 hores na rotonda del Montinco, cerca de la entrada a Coxersa, p’amosar a los gobernantes nuevos la so disconformidá con un proyeutu “que va empeorar la calidá ambiental mala que yá hai nel centru d’Asturies, encarecer la xestión de los residuos y destruyir materiales reciclables, amás del emplegu que se podría xenerar” col reciclaxe.