Coxersa licita la incineradora nun preciu de 250 millones d'euros

El Conseyu d'Alministración de Coxersa, que preside'l Conseyeru de Mediu Ambiente, Francisco González Buendía, aprobó esti vienres los pliegos técnicos y alministrativos de la incineradora.

La so publicación nos medios llegalmente establecíos va suponer l'entamu del procedimientu de llicitación del proyectu, obra y puesta en marcha cola modalidá de "concursu con almisión previa".
  
La planta de valorización enerxética de Coxersa sal a licitación pública con un presupuestu máximu de 250 millones d'euros. La compañía pública nun computa ente'l desembolsu previstu pa la puesta en marcha de la planta la cuantía derivada de l'aplicación del Impuestu sobre'l Valor Añadíu (IVA), porque esti deduzse y recupera en toles sos declaraciones mensuales, según informó'l Principáu.
  
Coxersa recurre a la modalidá de "concursu con almisión previa" pa la contratación d'esta importante infraestructura col fin de poner en valor la esperiencia previa y la cualificación humana y tecnolóxica de les empreses que puean tar interesaes. Van tener que participar polo menos na construcción y puesta en marcha de tres llinies o trés  plantes completes de valorización enerxética de residuos.
  
Una vez publicáu l'anunciu de licitación, les compañíes y uniones temporales d'empreses (UTEs) que deseen optar al mesmu van disponer d'un plazu de 37 díes pa presentar los sos credenciales no referentea diches variables, siendo'l próximu 14 d'avientu la fecha llenda d'almisión de documentos pa superar esti trámite.
  
Coxersa espera poder aprobar el llistáu d'almitíos nel mes de xineru. Va ser a partir d'esi momentu cuando empiecen a computar los trés meses de plazu pa la presentación de les ufiertes per parte de los candidatos; de forma tala que'l Consorciu confía n'axudicar la redacción del proyectu, la obra y puesta en marcha dientro d'un añu, nel mes de payares del 2011.

72 meses de trámites, obres y puesta en marcha
Coxersa vien anunciando dende hai meses que'l calendariu pa les distintes fases de tramitación alministrativa (licitación, autorizaciones ambientales y urbanístiques, execución de les obres y puesta en marcha en fase de pruebes de la planta de valorización enerxética ye ampliu y complexu. Según los cálculos iniciales, va ser difícil que s'asitie perbaxo de los 72 meses.
  
El primer encargu que va recibir de parte de Coxersa l'axudicataria de la planta de valorización enerxética va ser la ellaboración, nun plazu de 16 selmanes, del proyectu ambiental dirixíu a tramitar cola mayor axilidá posible l'Autorización Ambiental Integrada y l'Estudiu d'impactu ambiental que requier la instalación.
  
El Consorciu confía en que l'entamu de les obres puea tener llugar nel segundu semestre del 2013, con un plazu d'execución que podría algamar los dos años y mediu; al qu'habría que sumar la fase de puesta en marcha en pruebes de la planta de valorización enerxética.