Coxersa ha de presentar un informe que determine’l costu del proyeutu de la incineradora de Serín

La Xunta de Gobiernu de Coxersa aprobó la ellaboración d’un informe urxente pa determinar el costu que tuvieron que soportar les arques públiques pol proyeutu de la incineradora de Serín. Ésti quedó paralizáu por una decisión xudicial.
 
"Los asturianos tenemos derechu a conocer esta información y llogramos que la nuesa propuesta s'aprobara", dixo Alberto Tirador, secretariu de Política Municipal d'IX-LV al traviés d'una nota prensa. Ún de los aspectos que más preocupen a la coalición ye la falta d'un Plan de xestión de residuos, polo que pidieron al Gobiernu que lu ellabore de forma urxente. "Dende IX apostamos claramente por polítiques de sostenibilidá, basaes nel reciclaxe, la reducción de residuos y la reutilización", apunten. Otra manera, Tirador llamentó'l "tiempu perdíu" y dixo que los representantes de la coalición astuviéronse na votación del presupuestu, dao que, "ente otres coses, nun esiste nengún tipu d'inversión pa cumplir cola normativa europea qu'obliga a la recoyida selectiva de los biorresiduos y la so tresformación n'abonu y biogás".
 
Mentes, Foro Asturias Ciudadano (FAC) aseguró güei  que’l Gobiernu encabezáu por Vicente Álvarez Areces "incumplió los sos deberes en materia de residuos" y actuó "de manera desdexada" na tramitación de la incineradora de Serín. Al traviés d’un comunicáu, Foro recordó que, "tal y como puso de relieve la sentencia dictada pol Xulgáu de lo Contencioso-alministrativo númberu 1 d’Uviéu, Coxersa viose obligáu a dexar ensin efeutu la contratación d’una planta de valorización enerxética cuando ésta taba cerca d’axudicase en 300 millones d’euros".  La decisión d’aquietase a la sentencia y de dexar ensin efeutu l’espediente adoptóse na Comisión Delegada de la entidá y ratificada ayeri por unanimidá de los miembros de la Xunta de Gobiernu del Consorciu.
 
Presupuestu de 55,7 millones
 
D’igual forma, la Xunta de Gobiernu aprobó los presupuestos para el ejercicio 2012 con un volumen total de 55,7 millones de euros y una inversión de 9,5. Esta cantidá podrá ampliase en 31,6 millones d’euros con incorporaciones del remanente llíquidu de Tesorería que s’aprobarán a lo llargo del exerciciu cola fin de proporcionar financiación a les plantes de reciclaxe previstes nel Plan de Futuru 2002-2025 que tán ya en marcha. Les cuentes recueyen tamién un plan plurianual d’inversiones (2012-2015) que supón una cuantía total de 54 millones d’euros.