Costes diz que ye normal que Salinas pierda arena nesti tiempu

La Demarcación de Costes y el Ministeriu de Mediu Ambiente emitieron ayeri un comunicáu de prensa en que declaren que la obra de la saca de sable en Cabu Vidíu ta a puntu de terminar

La polémica obra d'estracción de sable del Cabu Vidíu pa rellenar con ello la playa de Salinas (Castrillón) sigue alantre, anque'l mal tiempu y la mar revuelto d'estos díes obligaron a parar el llabor, asegurando l'organismu ministerial que la obra va tar acabada pa mediaos del mes qu'entra o, en cualquier casu, nel plazu de cinco díes de magar la draga puea volver al llabor. El remate de la obra nun plazu curtiu ye imprescindible pa que la UE ponga los nueve millones d'euros que taben acutaos pa esta actuación, que crió la rocea de toles cofradíes de pescadores afectaes

Va dellos díes, la mar marchare con bien del sable que la draga "Geopotes XV" depositare dende l'aniciu de la obra na playa de Castrillón, lo que llevó a suponer a los contrarios a la operación de treslláu de los 545.000 metros cúbicos de sable previstos que tol sable que se punxere diba tornar pa la mar. El Gobiernu salió al pasu d'estes duldes asegurando que tol sable que se perdió estos díes marchó de la playa por culpa del mal tiempu, anque dende Costes sorrayen que se trata "d'un comportamientu cíclicu y normal de les playes que nesti tiempu tienden a garrar el perfil d'iviernu pa dempués camudar a otru perfil más acordies col veranu"