Cospedal diz que'l candidatu del PP asturianu sabráse aína

La secretaria xeneral del PP, María Dolores de Cospedal, aseguró esti martes que pronto se conocerá'l nome del candidatu del PP por Asturies pa les elecciones autonómiques. Ello ye qu'almitió que "pue ser" antes del Nadal.

De les 13 comunidaes autónomes que van dir a les urnes nel 2011, Asturies ye la única na que'l PP tovía nun desveló'l so cabezaleru de llista. Dende hai dellos meses, hai una crisis interna abierta ente los partidarios del ex ministru Francisco Álvarez-Cascos y los miembros de la dirección asturiana --lideraos pol alcalde d'Uviéu, Gabino de Lorenzo-- qu'apuesten pola conceyala uvieína, Isabel Pérez Espinosa.
  
Mientres esti debate internu, la dirección estatal foi aplazando la decisión a la espera de buscar un avertamientu ente les partes, recordando que'l plazu llegal pa proponer candidatos acaba n'abril y que, poro, disponen de tiempu bastante.
  
Va una selmana, los periodistes preguntaron nuna charra informal al presidente del PP, Mariano Rajoy, si la disputa por Asturies se resolvería antes d'estes fiestes navidiegues. "Nun lo creo", respondió escuetamente, evitando facer más declaraciones sobre esti asuntu.
  
La secretaria xeneral del PP dixo que podría ser este mesmu mes d'avientu. Preguntada si va haber candidatu antes de Navidá, respondió: "pue ser. Supongo que sí porque los tiempos van pasando".
  
Sicasí, añadió de siguío que "va depender de que se llegue a un acuerdu sobre'l meyor candidatu", aquél que "axunte al so favor más apoyos dientro de la mesma estructura del partíu y del apoyu de la ciudadanía n'Asturies, que ye lo importante".
  
No referente a si Álvarez-Cascos va ser la cabeza de llista, Cospedal indicó que l'ex ministru de Fomentu "ta como cualquier otru nun partíu onde hai una normativa, una forma d'actuar y un procedimientu". "Como ye normal ye algo que tien que decidir la dirección del partíu n'Asturies. Creo que lo vamos a saber pronto, porque los candidatos van conociéndose", sorrayó en declaraciones en Telemadrid, recoyíes por Europa Press.

Álvarez-Cascos participa en dos actos
Precisamente, Álvarez-Cascos va caltener esta selmana una intensa axenda, dao que ta previsto que mañana pronuncie una conferencia sobre l'AVE nel Colexu d'Inxenieros d'Asturies, un actu nel que lu apoyarán los sos siguidores, indicaron fontes averaes al ex ministru.
  
El xueves va recibir en Madrid el Premiu a la 'Trayectoria Política' que concede l'agrupación del PP del distritu de Salamanca. Esti galardón recayó n'años anteriores en José María Aznar, Manuel Fraga, María San Gil, Jaime Mayor Oreya, José María Álvarez del Manzano, Dolores de Cospedal o Manuel Pizarro, ente otros.