Cospedal asegura qu’hai tiempu pa escoyer candidatu

La secretaria xeneral del PP y presidenta del PP en Castiella-La Mancha, María Dolores Cospedal, manifestó que queda "un tiempu bastante llargu" pa la presentación y proclamación de los candidatos del PP a les elecciones del 22 de mayu.

"Hai munchos plazos y munchos meses hasta que llegue'l momentu de la proclamación de candidatos", manifestó De Cospedal mientres la rueda de prensa qu'ufiertó n'Albacete pa presentar al pie de los mozos de Nueves Xeneraciones de Castiella-La Mancha la campaña Populares Solidarios'. La llei establez el mes d'abril como fecha máxima por que los partíos dean a conocer les sos llistes electorales.
       
Hasta agora yá se conocen  los nomes de toos les cabeza de llista del PP a les elecciones autonómiques de mayu de 2011, sacantes el que va ser el candidatu n'Asturies. Nesta comunidá, hai una guerra interna ente los partidarios del ex ministru Francisco Álvarez-Cascos y los miembros de la dirección asturiana qu'apuesten pola conceyala uvieina, Isabel Perez-Espinosa.
  
Resolución enantes de febreru
En 'Xénova' esperen tener resuelta esta incógnita n'avientu y, a más tardar en xineru, col fin de poder presentar a tolos sos candidatos autonómicos na convención de candidatos que van celebrar en febreru, indicaron fontes 'populares'. Amás, prevén otru gran actu de partíu en marzu pa presentar a los sos candidatos municipales.