Corvera celebra la Folixa del Llibru con actividaes hasta'l día 27

|
Cubierta 'La palabra final. Diariu d'un suicidiu' de Roberta Tatafiore por María Antonia Pedregal

María Antonia Pedregal, cola traducción 'La palabra final. Diariu d'un suicidiu', y Berto García entamen alcuentros con llectores.

La Folixa del Llibru arranca güei en Corvera con actividaes que se van allargar hasta'l xueves 27 aprovechando la celebración del Día del Llibru (23 d'abril). Va ser cola obra de teatru 'Reinaré' de La Factoría Cultural d'Aviés a les 19 hores n'El Llar de Les Vegues.

Mañana'l llibru de Roberta Tatafiore que traxo al asturianu Pedregal, merecedor del II Premiu Florina Alías a la mayor traducción, va protagonizar la cita con llectores prevista a les 19 hores nel Centru Sociocultural de Les Vegues. Editada por Trabe dientro de la coleición 'Calume', ye un diariu de l'autora italiana onde cuenta la preparación del so suicidiu, planificáu y pensáu, a la edá de 66 años.

El xueves viniente va haber un alcuentru nuevu d'esti calter, nesta ocasión cola presencia del autor corveranu Berto García. Nesta ocasión adelántase a les 18 hores.

Llectura, conciertu, taller, cuentos mitolóxicos y proyeición

La programación de la Folixa del Llibru complétase con una llectura compartida'l vienres a les 16.30 hores na Biblioteca Municipal de Tresona y un conciertu de la Coral de DIFAC nel salón d'actos del centru cultural. Yá'l martes, va haber un taller de creación pa neñes y neños con Guayominí Producciones a les 12.15 hores en La Lechera de Cancienes, y el miércoles, cuentos mitolóxicos 'Ágada (guardiana del bosque)', de Teatro del Cuervo, a les 12.15 hores n'El Llar, y la proyeición de la película 'Los puentes de Madison' a les 19 hores en La Lechera.

Contador Estadistiques