Corrección técnica del Ibex

Anque´l vienres pasáu l´Ibex xubió un 1,39%, les perdes de la selmana pasada algamaron el 1,4% na Bolsa de Madrid. Dempués del bon andar de la bolsa de va dos meses p'acá les duldes de les últimes selmanes emburriaron una corrección técnica nel mercáu madrilanu. L´Ibex asistióse nos 6.387,8 puntos, con una xuba l'últimu díi de la selmana pasada del 1,39%. El volume de contratación nel parqué madrilanu meyoró un poco esta selmana pasada, con 1.500 millones d´euros negociaos el vienres pasáu, por poner un casu. L´indiz xeneral de la Bolsa de Madrid mangóse nos 666,53 puntos con una xuba del 1,02% mentantu l'índiz del Nuevu Mercáu asistiose nos 1.665,6 puntos dempués de ganar un probetayu 0,32%.



El vienres entamó cola mesma traza negativa del miércoles y xueves. Sólo'l perbonu ambiente de Wall Street afaló a los inversores de la Bolsa de Madrid a mercar dellos valores bursátiles. A últimos de la selmana los inversores nun tovieron munchos datos pa tomar decisiones, polo qu'atacaron el mercáu especuladores del tipu curtiuplacistes y traders y brokers profesionales. Nel Vieyu Continente les xubes del vienres foron xeneralizaes, alrodiu del 1% en Francfort, París y Londres. Otramiente, Wall Street pieslló en positivu siendo la cuarta selmana siguía de ganancies. El resume selmanal de los indices norteamericanos ye perpositivu cola xuba del 1,15% del Nasdaq y l'avance selmanal del 0,25 del Dow Jones. Esti últimu asistióse'l vienres pasáu nos 8.604 puntos mentantu'l Nasdaq mangóse nos 1.520.



L´anuncia de la OPA del bancu inglés Barclays sobre´l Bancu Zaragozanu foi ensin dulda la estrella de la selmana. Dempués de dellos meses en qu'anduvo ruxéndose la venta del Bancu poles condergues de Los Albertos, agora yá ye públicu'l destín del bancu aragonés. La ufierta de la OPA supera los 12 euros aición, talo como pidíen los Albertos. Ye un preciu esaxeráu según dellos banqueros españoles, pero'l Zaragozanu yera l'únicu bancu que cumplía les calterístiques que buscaben los ingleses. Agora la fusión del Barclays y el Bancu Zaragozanu n´España traerá nueves prexubilaciones a los trabayadores, neto qu'una riestra de perres pa que dellos directivos abandonen la entidá financiera. El vienres trunfó ENAGAS con una xuba del 3,36% hasta los 6,77 euros aición dempués del 4% de perdes que tuvo na bolsa'l xueves pasáu. A la contra Gamesa algamó unes perdes bursátiles de 2,81% anque los díis anteriores pintaren bien pa la compañía vasca. Too esto ye´l resultáu de delles perimportantes operaciones especulatives que se ficieron la selmana pasada nel mercáu madrilanu. Mala selmana del Grupu Telefónica, qu'intentó recuperar el tarrén que perdiere'l vienres pasáu con una xuba del 1,06% de la matriz. El vienres pasáu pesllaron en positivu Repsol, Iberdrola, Bankinter, Popular, BBVA y SCH. Otramiente confirmose la salida de Xabier de Irala d´Iberia y tamién se dio anuncia del prósimu destín del executivu, que ta na presidencia de la caxa vasca BBK Kutxa. Irala ye´l presidente que más tiempu tuvo na compañía aérea, pero'l xaréu que t´armando nun-yos presta gota a los accionistes de la aerolínea, que tan vendiendo papel de la compañía. El prósimu presidente d'Iberia va ser Fernando Conte.

L´euru ta aposentáu na llende de los 1,15 dólares. Nesta última selmana la divisa europa foi oxetu de dellos movimientos especulativos al alza y a la baxa. Nel pieslle del vienres pasáu l´euru mangose nos 1,149 dólares. Si la moneda europea sigue con fuercia les esportaciones d´Estaos Xuníos entamarán a medrar nunos meses, ello paralelamente a los problemes que va tener el sector esterior européu. Nel mercáu del oru prieto les xubes tan tomando fuercia, algamando'l barril Brent los 25,4 dólares, una xuba del 3%. La inestabilidá n´Iraq nun ye bona pa´l mercáu y mentantu nun s´esclarie la situación del petróleu iraquino nes prósimes selmanes, el preciu del barril podría asistiase guapamente nos 30 dólares. Dalgunos espertos falen del 2004 pal aniciu de les esportaciones del petróleu d´Iraq, data que-y queda mui lloñe al mercáu pero que vien mandada pol desgobiernu del país tres de la intervención norteamericana. Respective al Ibex tamos delantre d´un movimientu técnicu que ya entamare cola fin d´Abril al superar la barrera de los 6.600 puntos, pa tornar a los 5.450 a mediaos de marzu. Agora l´analis técnicu diznos que tien que correxir por tercer vegada les xubes pa llueu tornar a xubir con fuercia penriba los 6.600 puntos. Por ello la prósima selmana podremos ver l´Ibex nos 6.250 como base pa un nuevu rally alcista.