Corquiéu presentó'l so discu nuevu énte la prensa

Ayeri presentóse oficialmente nel local de la SGAE d'Uviéu el segundu discu de los asturianos Corquiéu. Dempués d'una llarga espera, los de Ribeseya afonden más no que s'albidraba d'ellos nel so primer discu.

Salia ye'l nome d'esti discu qu'asoleya y distribuye'l sellu Tierra Discos, iniciativa discográfica de Carlos Redondo y Igor Medio, componentes del Grupu Felpeyu. Medio, como productor del discu, tuvo tamién presente na presentación d'esti Salia qu'Asturies.com yá adelantare en primicia'l pasáu mes de mayu. En cuantes al conteníu del discu, grabáu n'Asturies y mzcláu n'escocia, Salia caltién les virtúes que Corquiéu yá espeyare nel so primer discu, La Barquera. que saliere espublizáu va yá pa cuatro años, pero agora'l grupu afonda nes dos llinies estilístiques qu'amosaba nesi discu, per un llau'l gustu por un folk contundente, rápido y que bebe ensin dubia de les fontes de grupos de corte irlandés y escocés. Esa podemos considerala una de les marques de la casa del grupu. La otra, l'apueste polos temes cantaos cola personal voz de la so vocalista Gema García. D'esta manera topamos siete temes cantaos nel discu con lletres del poeta Xandru Martino Ruz nos que l'estilu averáu a les voces tradicionales irlandeses de Gema mezse dacuando, con unos toques pop na so voz y nes igües que son incluso más marcaos que nel primer trabayu del grupu.


La ufierta del repertoriu instrumental de la formación, reforzada por ún de los
flautistes mozos más prometedores d'Asturies, el navetu Xurde Fernández, nun se sal de la llinia marcada nel anterior trabayu, amiestos de temes al más puru estilu Corquiéu, xunta pieces melódiques de calter más sele y igües cuidaes qu'equilibren el discu, que tien nel tema Ribeseyana la so carta de presentación. Fechu con versos de Pepín de Pría y del más modernu Xandru Martino Ruz, Ribeseyana cuenta la historia d'un emigrante que cola p'América nel famosu barcu "Habana" dexando a la moza en Ribeseya, llugar d'Asturies al que tol discu fai homenaxe, entamando pol nome del LP "Salia" aniciu llatín del nome del Ríu Sella, anque'l discu, con tenese mayormente na composición propia de los temes, recueye ente les pieces tradicionales qu'enxerta dende temes del occidente hasta pieces orientales.


La marca del sellu "Tierra Discos" que tamién abandera los trabayos últimos de Felpeyu y La Bandina'l Tombo, conózse na producción musical d'Ígor Medio, bouzouky de Felpeyu, y na gran aportación técnica nel soníu del escocés Grant Milne, que yá ficiere de técnicu de soníu pa grupos como Capercaillie o los Tanahill Weavers. Amás nel cd tamién collaboraron músicos como'l baxista Horacio A. García y Ramón G. Morán a los teclaos. Pa conocer meyor nada como sentilos mercando'l so discu, cosa que yá se puede facer na nuestra tienda n'internet Asturshop.