Córdoba 0 - Uviéu 1

A cinco minutos p'acabar, y xugando con diez, l'Uvieu taba por firmar l'empate a ceros col Córdoba, pero nun golpe de suerte, Oli marcó'l gol del trunfu. Anque l'equipu asturianu sigue rondando los puestos d'ascensu a primera, tampoco nun hai qu'escaecer que'l xuegu de los carbayones tampoco foi como pa tirar voladores.El Córdoba, que yá nun arriesga nada a estes altures, salió al campu con más gana que l'Uviéu, dominando'l xuegu anque siempres con munchos erros nos caberos metros. Pela so parte, l'Uviéu tuvo dos ocasiones clares na primer parte, que tamién tuvo un requexu pa la polémica cuando'l cordobés Juanito echó a corner coles manes un centru de Pablo Díaz. Na segunda, Óscar Álvarez foi doblemente protagonista pa los azules. Primero, porque salvó'l gol cordobés echando fuera la pelota xusto enriba de la raya con Eteban yá superáu, y segundo, por marchar pa la caseta con una doble mariella más que xusta nel minutu 64. Entamaba lo más difícil pal Uviéu, que yá aguantaba malamente con once los ataques del conxuntu local, pero la suerte llegó pa los de Marigil en forma del Gol de Oli y tamién col penalty sobre'l cordobés Fabao que l'árbitrio nun quixo pitar.