Convocáu el concursu de cuentos d'El Garrrapiellu

La Tertulia Cultural "El Garrapiellu" ta acabante de facer pública la convocatoria pa la celebración del so tradicional Concursu de Cuentos na edición correspondiente al 2005, que fai la XIV d'esti veteranu concursu. Como ye norma, los cuentos han tar redactaos dafechu en Llingua Asturiana, respetando les normes ortográfiques de la mesma, siendo preciso pa poder presentase tener más de 16 años. El llargor de los trabayos -unu por persona- nun pue pasar de les 12 fueyes mecanografíaes a doble espaciu, escrites per una sola cara, siempre con temática ye llibre.

El plazu d'entrega de los trabayos ta abiertu hasta'l 20 de mayu y tienen les señes aun han d'unviase son les de la Tertulia cultural "El Garrapiellu" separtáu de correos 8133 - 33280 de Xixón, nun sobre onde ha conseñase "XIV Concursu de Cuentos Curtios EL GARRAPIELLU". Dientro del mesmu han guardase l'orixinal del cuentu col titulu y TRES copies, baxo plica, amás d'otru sobre cola plica l'autor y el títulu del cuentu escritu per fuera, colos datos personales y un teléfonu de contactu.

El fallu'l concursu va facese públicu'l 10 de xunu, pasando los trabayos premiaos a propiedá de la Tertulia, qu'asume'l compromisu d'espublizalos nel III volume de Cuentos Curtios. En cuantes a los premios, acútase un primer premiu con 900 euros y diploma y un accesit de 300, anque'l xuráu va poder declarar el concursu ermu en casu de nun tener los trabayos presentaos un mínimu de calidá.