Convocatories

La Conceyalía de Cultura del Conceyu de Bimenes entama yá los actos de la que va ser el 1 de xunetu la VII Fiesta de la Oficialidá, cola que'l conceyu Yerbatu quier caltener la memoria d'aquel día en que l'asturianu se convirtió por primer vegada en llingua oficial, anque namás fuere nes llendes d'un conceyu. Ente'l programa de celebraciones, el conceyu da anuncia de la convocatoria del concursu de cuentos n'asturianu, pal que yá se conocen les bases y los plazos.

Ello ye que los cuentos han tar redactaos en Llingua Asturiana, respetando les normes ortográfiques vixentes, con una estensión másima de 10 folios. Los rellatos han presentase mecanografiaos a doble espaciu, per una sola cara. Unviaránse un orixinal, tres copies y una copia en versión informática. Cada autor/a nun podrá presentar namás qu´una obra. Les obres, ensin firma, tienen de presentase con nomatu, que dirá nuna plica aparte coles señes.

Les bases apauten que los cuentos han ser inéditos, de tema llibre, non premiaos n´otros concursos lliterarios y que ensn compromisu d´edición pendiente. El plazu pa mandar orixinales remata'l 18 de xunu del añu 2004 (fecha que va conseñar el matasellos de correos). Les obres premiaes van pasar propiedá del Conceyu, y nun va volvese nengún de los trabayos presentaos. El ganador tien un premiu de 755 euros, mientres que'l segundu premiu tien una dotación de 455 y el terceru de 305 euros Les obres han d´unviase poniendo en sobre "Casa de Cultura - VII Concursu de Cuentos pola Oficialidá del Asturianu - Bimenes ´04 - San Xulián s/n. 33527" la organizacioóndexa un númberu de teléfonu de contactu, que ye'l 985.70.48.16

D'otra manera, la emisora de radio "Onda Peñes" de Lluanco (107.7 fm) entama'l plazu pa presentar propuestes de programes colos qu'iguar la parrilla de programación de la emisora pa estos meses. A la emisora, que va da-yos preferencia a los proyectos de programes n'asturianu, prestaría-y recibir proposiciones nes sos señes del separtáu de correos 94 de Lluanco poniendo en sobre "Onda Peñes - Referencia: Proyeutos". El e-mail ondes@gaxarte.com y el teléfonu 985 88 26 26 tamién tan disponibles pa cualquier consulta