Convocaos los Premios 'Asturies Xoven'
|
9 Ochobre, 2017 por Redacción
La Conseyería de Presidencia convoca una edición nueva del Premiu 'Asturies Xoven' de Poesía, Narrativa y Testos Teatrales. El plazu de presentación d'orixinales, en castellanu o asturianu, va tar abiertu hasta'l día 27.
La Conseyería de Presidencia y Participación Ciudadana, pente medies del Institutu Asturianu de la Muyer y Polítiques de Mocedá, convoca una edición nueva del Premiu «Asturies Xoven» de Poesía, Narrativa y Testos Teatrales, dirixíu a autores asturianos, residentes nel Principáu o descendientes d'emigrantes, que la so edá nun supere los 35 años.
Los orixinales que se presenten pa caúna de les modalidaes, en castellanu o asturianu, han tener estes característiques:
- Poesía: poemariu con estensión superior a los 30 folios en lletra times new roman, cuerpu 12 y interlliniáu 1,5.
- Narrativa: conxuntu de narraciones curties o novela curtia, con una estensión de 76 a 120 folios, en lletra times new roman, cuerpu 12 y interlliniáu 1,5.
- Testos Teatrales: la estensión de la obra tien que s’adaptar a la d'una representación normal.
Los trabayos van entrgase en CD o llápiz de memoria, en sobre zarráu y col sistema de lema o plica, indicando la modalidá na que s'enmarquen. Amás, va axuntase otru sobre zarráu, col mesmu lema o plica, nel que se van incluyir los datos personales del autor y el so currículum personal y artísticu.
El plazu de recepción remata'l viniente día 27 y los orixinales han presentase nel rexistru xeneral de la Conseyería de Presidencia y Participación Ciudadana, na cai Eduardo Herrera, Herrerita, d'Uviéu. La solicitú que tien d'acompañar a cada trabayu puede descargase nesti enllaz:
Les obres ganadores van editase dientro de la colección Texu y los autores van recibir 50 exemplares.
El Premiu Asturies Xoven enmárcase nel Programa Culturaquí, impulsáu pol Principáu pa promover la creación artística xuvenil nes sos distintes modalidaes: artes plástiques, lliteratura y música, divulgar eses manifestaciones y fomentar la participación social de la mocedá.
Efrén d'Andrés
