Convocaes ayudes individuales de l’Axencia d’Emigración

Yá tan abiertos los plazos pa solicitar delles ayudes de les que conceden la Conseyería d'Asuntos Esteriores y l'Axencia d'Emigración.

Ente les ayudes que tienen abieertes les sos convocatories tan les que contemplen el retornu a Asturies a los emigrantes, empobinaes a sufragar los gastos estraordinarios derivaos del fechu del retornu que valgan pa cubrir o atender determinaes necesidaes económiques de los retornaos asturianos, asina como de los familiares que convivan y dependan económicamente d'ellos. El programa cuenta con una financiación de 130.000 euros, esistiendo un tope a cafda ayuda individual de 1.300, y ye posible solicitales hasta'l 30 de setiembre.

D'otra manera, tamién ye posible solicitar les ayudes individuales a emigrantes. Acordies cola situación socioeconómica del solicitante, contemplense un primer casu d'invalidez, un segundu d'enfermedá permanente y un terceru de precariedá y emerxencia social; apautándose una asistencia máxima de 600, 350 y 3.000 euros en cada casu respectivamente. El plazu de solicitú pa les dos primeras categoríes remata'l 30 de xunetu mientres que pa los que quieran acoyese al tercer supuestu enánchase'l plazu hasta'l 30 de setiembre. El presupuestu total d'esti programa ye de 439.000 euros.

P'acabar, esiste esti añu tamién una llinia específica d'ayudes pa los asturianos residentes n'Arxentina. Con un presupuestu de 9.000 euros, contemplen l'accesu a ayudes técniques que meyoren la so calidá de vida y integración nel entornu.

Ver les convocatories oficiales:
Pa emigrantes que tornen a Asturies
Ayudes individuales a emigrantes
Específiques pa emigrantes n'Arxentina