Convocada una asamblea n’Avilés pal xueves a les 20 hores

El movimientu de protesta pola situación actual promovíu por ciudadanos indignaos llega a Avilés. A les 20 hores d’esti xueves ta convocada una asamblea na plaza de la Casa Conceyu y delles persones tán organizándose pa pasar ehí la nueche.
 
Uviéu, Xixón y, agora, Avilés. Les tres ciudaes con más población del país nun son indiferentes al movimientu ciudadanu que ta viviéndose en tol Estáu. Esta tarde, a les 20 hores, ta programada una asamblea n’Avilés a la que s’espera qu’acuda un bon puñáu de xente. Según lo que se comenta peles redes sociales, la idega ye que delles persones pasen la nueche na plaza de la Casa Conceyu y que se creen turnos pa mantener la concentración, polo menos, hasta’l domingu, al igual que tán faciendo xixoneses y uviedinos.
 
Otra manera, la repercusión de les movilizaciones nel Estáu español, n’especial les de Madrid, ta llegando a toles partes del mundu occidental, siendo inclusive portada de periódicos de la tirada del Washington Post. London, Lisboa, Berlin, Manchester y Paris son dalgunes de les ciudaes onde se convocaron concentraciones solidaries cola protesta ciudadana nacida’l domingu pasáu tres una convocatoria de la plataforma ‘Democracia real yá’. Amás, en delles ciudades italianes tán programándose movilizaciones al traviés de les redes sociales a imitación de les que tán celebrándose en les ciudaes principales del Estáu.