Convocada la edición del 2016 d'Art Nalón

Tola documentación requerida ha d'entregase enantes del 14 d'ochobre.

El Conceyu de Llangréu ta acabante de convocar una edición nueva del concursu Art Nalón, que pretende "fomentar la creación artística de los xóvenes" y "servir d'escaparate d'esa producción". Asina, nél pueden participar mozos y moces nacíos o residentes nel Estáu que nun cumplieren los 36 años a 1 de xineru del 2016 y que nun resultaren premiaos n'años anteriores nesti concursu.

Los aspirantes han d'entregar un dossier informativu y fotográficu con al menos diez de les sos obres, que pueden ser pintures, escultures y grabaos, xunto con otros datos requeríos, nel Área de Mocedá del Conceyu de Llangréu enantes del 14 d'ochobre. El ganador llevará un premiu de 2.000 euros, mientres qu'habrá un áccesit por importe de 1.500 pal artista más destacáu de la Cuenca'l Nalón, amás del entamu d'una esposición.

La obra vencedora d'Art Nalón 2016 quedará cedida nel ayuntamientu llangreanu, que la treslladará a la Pinacoteca Municipal Eduardo Úrculo. Nesti concursu, el Conceyu de Llangréu cuenta cola collaboración del Institutu Asturianu de la Mocedá del Principáu d'Asturies.