Conveniu ente'l Ministeriu y la Fundación Osu

La Fundación Osu Pardo y la Fundación Biodiversidá tan acabantes de firmar un conveniu col Ministeriu de Mediu Ambiente pa desaniciar la caza illegal d'osos y les muertes accidentales d'estos animales. El conveniu, que tien un presupuestu de 356.087 euros, divídese per una parte na creación d'un equipu de vixilancia pa evitar la caza y, per otra parte, pretende guardar praos y tarrén cultivao con llindadores eléctricos pa que los osos nun caigan nos llazos que se-yos ponen a los xabalinos. Les actuaciones del conveniu van centrase sobremanera pa la parte del occidente asturianu, onde resiste la colonia d'osos más grande de la península, con cerca de 60 animales.

L'equipu de vixilancia va facese con cuatro persones seleccionaes ente la población rural, que tendrán de controlar la caza y les trampes, aparte de collaborar nel seguimientu demográficu y actividaes d'educación ambiental. Otramiente, pa evitar que nes trampes illegales que se-yos ponen a los xabalinos cerca de les güertes pueda quedar prindáu un osu, el conveniu inclúi la compra de 240 llindadores eléctricos .