Contratos pa la reconstrucción d'Iraq

L'Axencia Estadounidense pal Desarrollu Internacional (USAID) yá anda repartiendo contratos ente les empreses americanes pa cuando termine la guerra n'Iraq. Depués del polémicu contratu a Halliburton pa la reconstrucción de la infraestructura petrolera, Stevedoring Services of America va ser quien reconstruya'l puertu de Um-Qsar por decisión americana. La xestión del puertu Um Qasr alxudicose en 4,8 millones de dólares a la empresa de Seattle, que va organizar la lloxísitica del puertu pa cuando llegue l´ayuda humanitario y tamién l´ayuda non tan humanitario como material bélico, neto que poner la base pa qu'otres empreses yankis entamen elli a facer negociu.



Al llendáu y poco tresparente procesu de selección del que salió Stevedoring namás podíen presentase empreses norteamericanes, lo mesmo qu'a les demás contrates d'obres públiques y servicios pa depués de la guerra que vayan saliendo d'agora en p'alantre. Otramiente, según datos del Centre for Responsive Politics, entidá qu'estudia les aportaciones particulares a los partíos políticos americanos la empresa Stevedoring punxo perres pa la campaña presidencial del 1998 a dellos senadores demócrates y tamién republicanos, ente ellos Richard C. Shelby y Dianne Feinstein, defensores del ataque a Iraq. El proyecctu americanu pa depués de la guerra ye un negociu de más de 100.000 millones de dólares en condiciones de competir col históricu Plan Marshall que reconstruyó Europa tres la Segunda Guerra Mundial.

Con too y con ello, delles migayes tendrán d'acabar yendo pa los socios y países amigos de los EUA nel ataque, incluyendo a España. La otra selmana, la casa Merrill Lynch punxo nel disparaderu a Ferrovial, Dragados y ACS al enxertales nuna llista de posibles contratistes d'obra n'Iraq. Merryll Lynch recomendó invertir nelles como valores seguros en bolsa en cuantes que se daba por seguro que diben sacar daqué del conflictu.