Contra'l Lleida y contra l'árbitriu

Cuando'l Sporting marchaba pa Lleida a xugar l'últimu partíu oficial del añu, nadie nun s'enfotaba demasiao nel equipu, qu'ofreciere una imaxe mui mala esti sábadu en Molinón contra l'Eibar. El fríu polar (cerca de 0 graos) qu'había na ciudá catalana tampoco nun animaba demasiao, pero'l Sporting, que salió con una alliniación distinta a la de los últimos partíos, con Pablo Álvarez, Arthuro y Pablo Lago de titulares, demostró yá de mano que yera mui superior al conxuntu local, superando al Lleida en toles acciones y sobremanera nes salíes a la contra, nes que l'equipu asturianu demostraba una velocidá impresionante. Dorado y un Pablo Álvarez que firmaba ún de los meyores partíos del añu tuvieron les primeres oportunidaes clares, pero foi Ismael Irurzun el qu'adelantó al Sporting nel minutu 32 del primer tiempu aprovechando un fallu de la defensa que provocó l'enfadu de l'afición local. Col primer tiempu p'acabar, Edu, el porteru del Lleida, cometía una falta clara sobre Arthuro, que taba en posición pa marcar. Dorado Rodríguez, árbitriu que foi la bicha pal Sporting nel famosu partíu n'Eibar n'anterior campaña, perdonó-y la tarxeta encarnada al porteru, sacándo-y namás que la mariella y señaló'l penalti, que convertió ensin mayor problema Ismael, pero Dorado interpretó que'l delanteru ficiere una maniobra illegal nel llanzamientu, obligando a repetir el tiru. El capitán del Sporting, Samuel, asumió la responsabilidá y convertió definitivamente'l 0-2.

Nel segundu tiempu, el Sporting siguió superando con facilidá a un Lleida desnortiáu qu'acusaba la falta de Stankovic. Dorado Rodríguez, retorcigañáu na so manera d'entender el xuegu, ponía otru puntu más de tensión na so rellación col equipu asturianu espulsando a Samuel nel minutu 76. El motivu yera que'l de maliayo s'entretuviere en sacar una falta… mientres el Lleida facía un cambéu doble. N'inferioridá numérica, el Sporting acusó la falta del capitán y el desgaste, colo que los últimos diez minutos vieron a un Lleida más baruyón qu'otra cosa allegase al área del Sporting, creando dos ocasiones clares de gol. Asina, nel 82, Pablo Lago sacó baxo los palos un remate d'Arnal, y, col partíu yá acabando, Crusat llanzó un remate peligrosu que salió fuera.