Continúen les acampaes de los indignaos en Xixón, Uviéu y Avilés

Los ciudadanos indignaos pola situación actual van siguir acampaos en Xixón, Uviéu y Avilés. Pese a que dalgunos medios de comunicación señalaben que l’oxetivu d’estes movilizaciones yera influyir nel 22-M, los acampaos demuestren que la so aición va más allá d’esa fecha.
 
Tolos díes, a les 20 hores, van continuar celebrándose asamblees y van siguir los turnos pa facer nueche tanto na Plaza Mayor, como na Escandalera y la plaza de la Casa Conceyu. La fecha del movimientu ciudadanu que nació’l 15 de mayu con una convocatoria peles redes sociales, de momentu, nun tien fecha de caducidá.
 
En Xixón tán programaes delles actividaes pa la xornada de güei que principiaron pela mañana con un taller d’acrobacies y estiramientos, y que van continuar pela tarde a les 18 con un pasucais con ruíu pa lo que s’anima a la xente a que traiga dalgún instrumentu. A les 19 hores, la Charanga Ventolín va tar presente na Plaza Mayor y una hora más tarde, va celebrase l’asamblea. Pela nueche van proyeutase los curtios documentales ‘La historia de las cosas’, ‘Obsolescencia programada’ y ‘La isla de las flores’ y, a les 22 hores, va haber una ‘jam’ de poesía. Amás, ta a disposición de tolos ciudadanos un espaciu pa la reivindicación al traviés del arte baxo’l nome de ‘indig-N-arte’.
 
Mentes, n’Uviéu ta previsto rodear la Xunta Xeneral con una cadena humana tres l’asamblea, pa lo que se pide a tolos interesaos en participar que traigan un pañuelu blancu. N’Avilés va facese un casting d’indignaos nel que les persones que quieran van poder mostrar la so indignación delante d’una cámara. Esta iniciativa va principiar a les 16 hores y va durar hasta les 19, una hora enantes de l’asamblea.
 
Otra manera, en Mieres hubo ayeri una concentración de protesta y ta prevista la celebración d’una asamblea esta tarde, a les 20 hores. Los presentes van facer una cadena humana alredor de la Casa Conceyu.