Contentu en Truyés pola decisión de Cultura

Na parroquia corverana de Truyés ta previsto construyir 600 viviendes y un campu de golf sobre una superficie expropiada de cerca de 1 millón de metros cuadraos. L'agresiva actuación urbanística ta topándose cola resistencia d'una plataforma cívica que fai llabor por caltener el patrimoniu de l'arquitectura y el paisaxe tradicionales del llugar. Dempués de que la Conseyería de Cultura refugare la másima catalogación patrimonial pa Truyés, el movimientu ciudadanu ta acabante de conseguir un tantu al so favor al reconocer la Conseyería la esistencia de "elementos etnográficos a caltener" en Truyés.

La Plataforma pola Defensa del Patrimoniu Cultural de Corvera emitió un comunicáu nel qu'espresa la so satisfacción "parcial" pola decisión de la Conseyería de Cultura, que reconoz la esistencia de " elementos etnográficos a caltener" dientro del proyectu urbanísticu SAPU VI de Truyés, atendiendo a la demanda de la plataforma.

La Plataforma sorraya la importancia que tien el que Cultura-y recuerde al Ayuntamientu de Corvera la necesidá de caltener el noyu de Truyés, y encamienta a que s'enxerte'l pueblu nos catálogos de bienes inmuebles reconocíos como patrimoniu, pero llama l'atención sobre la protección que yá tienen reconocida una riestra d'inmuebles per aciu de la Disposición Transitoria tercera de la Llei de patrimoniu cultural d'Asturies. Esta llei resguarda de cualquier actuación agresiva sobre los mesmos a elementos como son los horros y paneres, les cuadres, fontes y llavaderos tradicionales y a les caseríes rurales que tengan fecha de construcción anterior al añu 1800 como ye'l casu de les edificaciones más antigües de Truyés. Con ello, la plataforma quier sorrayar el fechu de que'l centru del pueblu, onde s'apetiguñen les cases más antigües de Truyés, yá esfruta d'esa protección preventivo que-y da la llei de patrimoniu.


Con too y con ello, la plataforma corverana quéxase de que nel informe que presentó la Conseyería de Cultura échase en falta una valoración sobre los elementos arqueolóxicos que la plataforma conseñare na denuncia, polo que dan anuncia de que van volver a mandase a la Conseyería pa que lo tenga en cuenta. La plataforma popular echa'l pelotu al teyáu del Ayuntamientu y diz que anque la decisión final ta en manes del equipu de gobiernu, ello con saber esi equipu que tol pueblu y bien de la so redolada yá tienen esa protección preventivo que garantiza la Llei de patrimoniu
.
Más información na web de la plataforma "La foz del Pielgu"