Consumidores denuncia a Telecable por retirar les canales locales

La Unión de Consumidores d'Asturies (UCE) dio anuncia ayeri de la presentación d'una denuncia énte l'Axencia de Sanidá y Consumu contra la empresa de telecomunicaciones por retirar ensin avisu previu les canales locales asturianes de la so ufierta de TV per cable.

El presidente de la UCE calificó d'abusu la decisión de Telecable de torgá-yos la señal de les televisiones locales d'Asturies a los sos abonaos y dio anuncia de la presentación d'una denuncia na que se sorraya que se dañen los intereses económicos y de contratu de los abonaos y que se viola'l derechu a la llibertá d'espresión atechándose na situación de monopoliu de fechu que tien la empresa cablera n'Asturies, que taría faciendo de menos a los sos abonaos, que s'apuntaron nel so día al serviciu de Tv por cable atrayíos pola presencia na so parriya de programación de toles canales locales del país.

La UCE diz que l'abusu que fai Telecable sobre los sos veceros conózse en más actuaciones de la empresa, a la qu'acusa de poner nos sos contratos cláusules de permanencia obligatoria de seyes meses, llegando a la fin a la falta de calidá na prestación de los sos servicios, cosa que se vio n'agostu cuando Telecable entamó la desconexón de canales locales asturianes, que se sostituyeron na programación por canales temátiques estranxeres, ello ensin que se-yos diere parte a los abonaos al traviés de la revista que se-yos unvia cola programación de cada mes y mientres se caltienen na parriya otres canales autonómiques como Telemadrid o Canal Sur. Pal presidente de la UCE ye incomprensible qu'una empresa de capital asturianu como Telecable, na que participen Caxastur, HC y la editorial del diariu La Nueva España dexe d'emitir les canales locales de manera tan arbitraria, al empar que-yos píde a Telecable que dea marcha atrás y a los consumidores que reclamen na UCE pa facer más presión.