Constitúise en Bimenes l'asociación de traductores profesionales d'asturianu Verbéu

Va ser nel salón de plenos baxo la presidencia de Dani Menéndez. Entréguense tamién esta fin de selmana los premios del XXIV Concursu de Cuentos pola Oficialidá del Asturianu.

Bimenes va ser la sede de l'asociación de traductores profesionales d'asturianu Verbéu, que se va constuyir oficialmente esta tarde. El coleutivu va entamar na Casa Conceyu l'actu fundacional a les 19.30 hores d'esti coleutivu.

Nun va ser la única actividá al rodiu l'idioma que va celebrar el conceyu yerbatu estos díes. La Casa Cultura de Santuyano va acoyer mañana, a les 18 hores con aforu llendáu por protocolu COVID-19 –pue acutase sitiu nel teléfonu 985.70.00.04–, la entrega de premios del XXIV Concursu de Cuentos pola Oficialidá del Asturianu, eventu nel que'l ganador Pablo Rodríguez Medina va lleer la so obra ‘En brazos de naide'.

Solinca Turbón, por ‘Enguedeyos y mentires', y Gonzalo González Barreñada, ‘La muerte d’acebache’, algamaron el segundu y el tercer premiu. Los trés conocíos autores van recibir 600, 450 y 300 euros, de manera respeutiva.

L'actu complétase col monólogu 'Sporting 1978' de Carlos Alba 'Cellero'. Ye una obra cómica col meyor Sporting de la historia como tresfondu. 

Na semeya, Casa Conceyu de Bimenes.