Conseyu de Gobiernu aprobó l’espediente toponímicu de Ribedeva

El Conseyu de Gobiernu del Principáu d'Asturies aprobó na so reunión d'esti xueves 22 de marzu l'espediente pol que s'apauten los los topónimos oficiales del conceyu de Ribedeva, que s'asoleyarán en BOPA d'equí en pocos díes. Dende qu'entamó'l procesu d'oficialización de decretos toponímicos nel añu 2005, son yá 19 los conceyos que tienen oficializaos los sos nomes tradicionales, mientres qu'otros 14 espedientes de conceyos alcuéntrense en "fase avanzada de tramitación".

Ribedeva, asitiáu nel estremu oriental d'Asturies, conviértese asina nel quintu conceyu que normaliza la so toponimia nel añu 2007, dempués de que'l 31 de xineru s'aprobaren en Conseyu los espedientes de los conceyos d'Amieva, Corvera, Grau y Noreña. Nel 2006, añu en que'l procesu de recuperación toponímica entró en crisis, namás vieren el trámite definitivu los espedientes de Nava, Xixón, La Ribera y Colunga.