Consensu na refuga a la propuesta d'Esquerra

Partíos políticos y instituciones siguen dando'l paecer
énte la propuesta catalana. La oficina de política
llingüística del Principáu, el PSOE y Andecha Astur
coinciden en considerar esta propuesta como un inxerencia na política
llingüística asturiana, y refuguen dafechu la oficialización
del gallegu nel estremu occidental asturianu.



El Partíu Socialista Español espresó'l so malestar
pa col proyectu de llei que presentó Esquerra Republicana de Catalunya
nel congresu de los diputaos. Asina'l PSOE pide a Esquerra que nun "
interfiera na autonomía d'Asturies". El partíu socialista,
dempués de conocer les intenciones d'Esquerra, pidió a la so
dirección federal en Madrid que se ponga en contacto con Esquerra pa
"facelos recapacitar", y aseguren tar trabayando pa torgar
l'aprobación d'esta llei tal como ta. El responsable de la oficina de
política llingüística del Principáu Ramón
d'Andrés tamién consideró d'intolerable dende'l puntu de
vista d'Asturies la propuesta catalana .



Pel so llau Andecha Astur, nún comunicáu fechu públicu
ayeri, recuerda que'l Principáu ye "l'auténticu
responsable del procesu colonizador que ta careciendo Asturies".
Amás la organización política anuncia que va aconceyase de
manera urxente con Esquerra Republicana,
yá qu'Andecha Astur participa
na plataforma Europa de los
Pueblos onde tamién ta'l partíu republicanu catalán.
Andecha asegura nel comunicáu de prensa que quieren falar con Esquerra
col oxetu de "que corrixan tan grave error, nel convencimientu de que se
debe cenciellamente a la desconocencia de la realidá
llingüística asturiana". De la mesma manera esta
formación polñitica tamién asegura que'l caltenimientu de
la propuesta na so redacción actual "condicionaría
perdafechu" les sos rellaciones cola formación política de
Carod Rovira. Nel so comunicáu Andecha tamién quier facer
rescamplar que ye'l Principáu'l responsable d'esta situación
negando'l derechu a la oficialidá de la llingua asturiana, y porque ta
intentando "inventar una nueva llingua (el «gallego-asturiano»)
nel occidente asturianu cuando ye perfechamente sabedor de que ye imposible
inventar una nueva llingua románica en plenu sieglu XXI". Con too y
con ello Andecha afirma que pa que se pudiera aplicar esta propuesta n'Asturies
tendría de reformase l'estatutu d'autonomía, cuestión
qu'Andecha considera bien difícil que se produza.