Conferencia sobre cambéu climáticu n'Uviéu

Ricardo Anadón Álvarez, caderalgu d'Ecoloxía de la Universidá d'Uviéu, da esti vienres 3 de marzu una conferencia en Club de Prensa d'Uviéu. Ello va ser a les 8 de la tarde nel local de Club de Prensa de La Nueva España (Cai Calvo Sotelo 8 - Uviéu) onde Ricardo Anadón va falar sobre'l cambéu climáticu. Miguel Ángel Comendador García, caderalgu de Xenética de la Universidá d'Uviéu, va ser quien presente al conferenciante.

La conferencia del caderalgu asturianu va ser nun día en que se dieron a conocer tamién los últimos datos sobre la fusión del xelu de l'Antártida. Según diz un informe de los profesores del Universidá de Boulder (Colorado EEUU) Isabella Velicogna y John Wahr qu'asoleya la revista Science y que se fizo con datos del trieniu 2002-2005 obteníos por dos satélites de la NASA, l'Antártida, que tien el 90% del xelu del planeta, pierde al añu alredor de 152 kilómetros cúbicos del so volume de xelu por causa del calecimientu global. La prestixosa revista científica diz nel so informe que'l nivel del mar xube por términu mediu 0,4 milímetros al añu por causa d'esti fenómenu, que ta acelerándose y que va llevar a cambeos fondos nos sistemes climáticos del planeta.