Conferencia de la Fundación Caveda y Nava

La Fundación Caveda y Nava sigue esti vienres col ciclu de conferencies "Llingua asturiana y llingües en peligru" qu'entamare a últimos del añu pasáu y que ta trayendo a Asturies a los espertos más acreditaos del mundu nesti tema, como Fèlix Martí i Ambel, de la UNESCO, y Juan Carlos Moreno Cabrera, especialista en Llingüística Xeneral. La Fundación quier con esti ciclu llamar l'atención sobre les precaries condiciones en que s'atopa l'asturianu, nel marcu más ampliu de la sobrevivencia de les llingües minoritaries. La cita pa esta selmana ye'l vienres dia 7 nel Aula Magna de la Universidá d'Uviéu, onde'l profesor Claude Haege va dar la conferencia entitulada «Por una promoción de

les llingües minoritaries»

Claude Haege ye profesor del Collège de France, y autor del llibru Halte à la mort des langues,
traducíu al español col títulu "No a la muerte de las lenguas". Nacíu en Túnez en 1936, nun entornu marcáu pol contactu con estremaes llingües, Claude foi discípulu de figures cimeres de la llingüística del sieglu XX, como Émile Benveniste, André Martinet, L. Renou, Marcel Cohen o Roman Jakobson, ocupándose a lo llargo de la so formación d'estudiar un bon númberu de llingües de toles partes del mundu, como l'África subsahariana, Oriente Caberu, Europa, les reserves indies de Norteamérica, el mundu árabe y les isles de Micronesia, sin escaecer les llingües minoritaries de Francia. Profesor dende 1988 nel Collège de France, tien el Gran Premiu d'Ensayu de la Société Générale des Gens de Lettres, y el Premiu de l'Academia Francesa de 1986 pola obra L'homme de paroles; ye Caballeru de la Lexón d'Honor (1989), Oficial de la Orde de les Palmes Académiques (1995), Caballeru de la Orde de les Artes y les Lletres (1995) y Medalla d'Oru del CNRS (Centru Nacional de la Investigación Científica, 1995), anque'l públicu asturianu conoceralu más que por toes estes reconocencies pol llibru "No a la muerte de las lenguas", "llibru prietu" sobre l'estáu actual de la glotodiversidá mundial precedíu d'un ampliu repasu al so tratamientu históricu nel que s'analicen los peligros que cuerren munchos idiomes, clasifícando les modalidaes de desaniciu llingüísticu, esponiendo les causes del desaniciu, les etapes del procesu d'estinción y apurriendo datos precisos sobre la salú llingüística de munches rexones del mundu, ufriendo al empar les posibles víes de recuperación.