Confederación Hidrográfica ábre-y espediente al conceyu de Samartín del Rei Aurelio

La Confederación Hidrográfica del Norte abrió-y espediente sancionador contra'l Conceyu de Samartín del Rei Aurelio polos vertíos que se rexistren dende'l branu del 2005 nel ríu Nalón y que proceden del polígonu industrial de La Florida.


La CHN diz que nun-y consta que los vertíos cuenten cola autorización alministrativa que manda l'organismu, polo que va atender les denuncies que-y vinieron dende asociaciones y partíos como IX-BA o la Plataforma de Defensa del Mediu Ambiente del Valle del Nalón, que lleven tiempu alvirtiendo que los vertíos al Nalón al so pasu pel Polígonu de La Florida son vezu yá dende mediaos de los años 90, cuando entró en serviciu l'área industrial de Sotrondio. La organización Greenpeace tamién inxertare estos vertíos d'aceites industriales nos sos informes añales sobre calidá del agua nel Estáu. De fechu, el conceyu de Samartín del Rei Aurelio yá tuvo de pagar una multa por vertíos al Nalón nel añu 2001, anque l'importe de la multa namás foi de 756 euros más otros 378 por daños.