Condena al Ayuntamientu de Xixón por nun aprebar les ordenances del asturianu

La formación nacionalista Izquierda Asturiana remembra qu'un de los puntos del alcuerdu de gobiernu municipal ente PSOE y IX-BA uno de los compromisos del mesmo consistió na creación de la Oficina de la Llingua ye'l so Conseyu Asesor que presentó va meses yá una propuesta de regulación del usu del asturianu al traviés d'una ordenanza específica, que va delles selmanes yá se sabía que'l grupu socialista refugaba porque incluyía aspectos como'l derechu de la ciudadanía a recibir información n'asturianu y a poder comunicase cola corporación local nesta llingua.

Según diz el comunicáu d'IAS, dempués d'analizar los fechos y de consultar con dellos actores implicaos na polémica, l'agrupación local d'Izquierda Asturiana de Xixón "considera qu'esti fechu resulta d'una gravedá inusitada en cuantes qu'esos derechos yá tan consagraos pola Llei d'Usu y Promoción del asturianu, testu qu'anque'l PSOE decida ignorar permanentemente, esiste y ta en vigor". Dende IAS nun son a esplicase como'l Conceyu de Xixón nun ye a aplicar una ordenanza como la que se propón, que yá ye muncho menos ambiciosa que les que s'aprobaron n'otres comunidaes con llingua propia oficial y que son equivalentes a les que'l mesmu PSOE fai propies n'otros conceyos como Uviéu o L.lena. IAS echa a partes iguales contra'l PSOE como contra IX-BA, de los que diz que "tan xugando un papel llamentable demostrando que tola capacidá de presión que demuestren n'otros temes conviértese en docilidá y inacción cuando se trata de defender la cultura asturiana de los ataques del PSOE"

Pa IAS la refuga a aprebar les ordenances del asturianu por parte del equipu que dirixe l'alcaldesa Felgueroso supón una "auténtica burlla" a los sectores implicaos y a tol pueblu de Xixón, que ve como se gasten los sos recursos en mera propaganda efímera a costa del asturianu y a mayor gloria de l'alcaldesa y del PSOE mientres IX-BA escuende la cabeza debaxo del ala".