Concursu de gaita en Xixón

Pa últimos de xunetu en Xixón va haber un concursu pa
gaiteros solistes pal que ya ta abiertu'l plazu d'inscripción.



Esti concursu entámalu'l departamentu de Festexos del
Teatru Xovellanos de
Xixón cola collaboración de l'asociación cultural
Banda de Gaites Noega. El
concursu ye pa gaiteros/es solistes, y ta dividíu nes categoríes
infantil y xuvenil, la primera p'aquelles persones que cumplan 14 años o
menos nel 2003, y la segunda p'aquellos que cumplan 18 años o menos nel
2003.



Pa la fase eliminatoria, que va desenvolvese los díes 28 y 29 de
xunetu, nun s'esixe nenguna pieza en concreto, namás se piden dos
pieces del repertoriu tradicional asturianu, mientres que na categoría xuvenil una de
les dos pieces tien que ser o tener una parte en tonu menor. Pa la fase final,
díes 30 y 31 de xunetu, tamién hai que tocar dos pieces, pero
nesti casu una d'elles va ser obligada, pa la categoría infantil
"El Saltón" o "El Xiringüelu" y pa la
categoría xuvenil "La muñeira del gaiteru de
Veriña".

El primer premiu na categoría infantil ye de 300 euros y 600
euros na categoría xuvenil, y el plazu d'inscripción acaba'l
miércoles 29 de mayu a les 14:00 hores. P'apuntase hai que rellenar el
boletín d'inscripción y unvialu al departamentu de festexos del
Teatru Xovellanos de Xixón cai Casimiro Velasco nº 23, cp: 33201.